Gottfried vun Arnsberg
Gottfried vun Arnsberg (* üm 1285; † 1363 in Stood) weer Graaf vun Arnsberg un vun 1348 bet 1359 de Arzbischop vun Bremen.
Gottfried weer de Söhn vun Ludwig vun Arnsberg un Pironette von Jülich. He weer toeerst Doomscholast in Mönster un denn vun 1321 bet 1349 de Bischop vun Ossenbrügge. 1348 sett em Paapst Klemens VI. as Arzbischop vun Bremen in. Doch de Stift harr al Graaf Moritz vun Ollnborg as Opfolger utwählt. 1350 keem Gottfried na Bremen. Moritz verleet nu de Stadt un söch sik de Grafen vun Ollnborg, de Hertög vun Lüünborg un de Wurster Buurn as Verbünnte. Gottfried harr blots Bernd vun Hoya op sien Siet. In’n Juli 1350 keem Moritz mit en Heer vun 900 Mann na Bremen. Gau harr he de Stadt innahmen. Gottfried dröff den Titel Arzbischop behollen, doch to seggen harr nu blots noch Moritz in’t Arzbisdom. Doch de Stadt Bremen un de Hanse weren gor nich tofreden mit de Politik, de Moritz maken dee. Ok Gottfried, de nu in Hoya seet, harr sik mit Hertog Magnus I. vun Brunswiek utklüüstert, dat Magnus sien Söhn Albert II. vun Brunswiek-Lünborg de ne’e Arzbischop warrn schull. Paapst Innozenz VI. weer dor ok för. So güng dat 1358 los, dat se Moritz angrepen hebbt. 1359 is Albert as ne'e Arzbischop vun Bremen ankeken wurrn. 1362 weer dat mit Moritz sien Wedderstand denn ganz ut. Gottfried aver güng nu in’t St.-Georg-Klooster in Stood, wo he 1363 doodbleven is. Sien Graff liggt hüüt ünner dat Tüüchhuus, dat de Sweden later dor opstellt harrn. 1992 hebbt de Archäologen dat wedderfunnen.