Frederick William Frohawk

Vun Wikipedia
Wesseln na: Navigatschoon, Söök
Frederick William Frohawk

Frederick William Frohawk (* 16. Juli 1861 in Brisley Hall, East Dereham, Norfolk, England; † 10. Dezember 1946) weer en britisch Lepidopteroloog un Deertenmaler.

Leven un Wark[ännern | Bornkood ännern]

Frohawk weer de Söhn vun en Buer un dat jüngste Kind in de Familie. Sien Interesse, Deerten to teken, wurr vun sien Moder ünnerstütt un sien Faszinatschoon för Bottervagels fung an, as he mit söben Johr en Gemeenen Heufalter fung. As de Familie nah Great Yarmouth un later nah Ipswich truck, hett Frohawk völ interessant Bottervageloorten sammelt. Nah de Dood vun sien Vader 1873 truck de Familie nah Croydon un later nah South Norwood. Frohawk hett dat Norwood College besöcht. Wiels disse Tiet führ en Typhuserkrankung dorto, dat he up een Oog meest blind wurr. 1880 truck de Familie nah Upper Norwood. As he 20 Johr olt weer, wurr Frohawk Tekner bi dat Natuurjournal The Field. He hett de Bekanntschap mit Lord Walter Rothschild maakt, de sien Arbeiten fördern dee un later sien Bottervagel-Aquarelle köfft hett. Frohawk hett tallriek Warken mit Illustratschonen versehn, dorünner Aves Hawaiienses: The Birds of the Sandwich Islands vun Scott Barchard Wilson un Arthur Humble Evans (1890–1899), Birds of the British Isles and their Eggs vun Arthur Gardiner Butler (1898), för dat he etwa 500 Teknungen maakt hett, un Extinct Birds vun Lord Walter Rothschild (1907). Sien wenig ornithologisch Artikels hett he ünner annern in de Journalen Bulletin of the British Ornithologists’ Club, Ibis un Field verfaat.

Frohawk hett ok mehrere Böker över britisch Bottervagels, dorünner The Complete Book of British Butterflies (1934), Varieties of British Butterflies (1938) as ok dat tweebannig Standardwark Natural History of British Butterflies (1924) verfaat. 1927 weer Frohawk ut Geldnot dwungen, sien kumplett Bottervagelsammlung för £1000 an Lord Rothschild to verkoopen. De is nu en Deel vun dat Walter Rothschild Zoological Museum in Tring.

1895 hett Frohawk Margaret Grant heiraadt. Mit hör harr he twee Döchter. Nahdem Margaret Grant 1907 storven weer hett he 1909 Mabel Jane Hart Bowman heiraadt. Mit hör harr he noch sien darte Dochter, Valezina, de Frohawk nah en dunkel Form vun den Kaisermantels (Argynnis paphia f. valesina) nömmt hett.

1891 wurr Frohawk to’n Fellow of the Royal Entomological Society un 1895 to’n Member of the British Ornithologists’ Union wählt. 1926 wurr he levenslang Ehrenliddmaat vun de Entomological Society. 1946 wurr he in de Headley, Surrey beerdigt. 1996 hett sien Dochter Valezina in’ New Forest en Gedenktafel, den so nömmten Frohawk Ride, inweeht.

Literatur[ännern | Bornkood ännern]

  • Salmon MA; P Marren; B Harley (2000): The Aurelian legacy: British butterflies and their collectors. University of California Press. S. 193–197.
  • Chatfield J (1988): F. W. Frohawk: his life and work. The Crowood Press, Marlborough (Wiltshire).
  • Valezina, Viscountess Bolingbroke (1977): Frederick William Frohawk. A memoir by his daughter. E. W. Classey Ltd., Faringdon.
  • Mullens, William Herbert & Swann, Harry Kirke (1917/Nachdruck 1986): A Bibliography of British Ornithology. ISBN 0-854-86098-3.
  • Valezina, Viscountess Bolingbroke (1988): I remember. Feather Books, Shrewsbury.