Fredeborg

Dat faste Huus mit den Naam Vredeborch wuur an’n Anfang vun’t 15. Jahrhunnert van de Bremers bi Atens (Noornham) twüschen de Werser un de Heete upboot. De Dwingborg mit Wahnungen, Ställ, Spiekers, Keller, Lock un enen Torn weer umgeven van Müren, enen breden Graven un hoge Eerdwäll. Se schull de bremsche Schippfahrt up de Werser sekern un Stüttpunkt wesen för de Kriegstöög, de de Bremers in dat Stadland un na Butjadingen unnernehmen. De Fresen versochen, de Borg intonehmen, aver dat weer nich so licht. Bi enen van ehre Överfäll wuurn de beiden Hööftlingssöhns Didde un Gerold fungen nahmen, na Bremen brocht un dar henricht. (Hermann Allmers hett darto dat Gedicht „Der Bruderkuss“ schreven). 1423 överfull ene starke Strietmacht unner dat Leit van Sibeth Papinga de Fredeborg un kunn de Besetters verdrieven. De „Vredeborch“ wurr den Eerdbodden liek maakt un so weer de Herrschap van de Bremers över Butjadingen braken. Vundaag steiht an de ehrmalige Borgsteed en Saalbo mit en Hotel.