Butjadingen

Vun Wikipedia
Wesseln na: Navigatschoon, Söök

Butjadingen is de nördliche Deel van de Wersermasch. De südliche Grenz verlöppt ungefähr van de Werser dwars dör na de Noordoosteck van den Jadebusen, sotoseggen dar wo fröher maal de Heete ehren Loop harr. Butjadingen weer de Oostdeel van den Fresengau Rüstringen. Dör depe Flootinbröök entstund hier de Jadebusen mit de Freesche Balje, de den Gau in twee Reststücken updelen de. De westliche Deel woor „boven de Jade“ un de na de Noordsee to woor „buten de Jade“ nöömt. Sietdem gifft dat den Naam „Butjadingen“. De plattdüütsche Naam is Butjaarland, un de Inwahners weert ok woll Butjenters nöömt

De öllste Oort in Butjadingen is wahrschienlich Blexen. Hier weer al in de vörchristliche Tiet ene Thingsteed. Bekannt woorn is de Oort, wiel hier 789 de Missionar un Bremer Bischop Willehad up ene van siene Missionsreisen sturven is. De Blexer Hypolit-Kark is ene van de öllsten Karken an de Nordseeküst un weer vör de Reformationstiet ene Wallfahrtskark

1404 boon de Bremers in Atens de Vredeborch, un togen van dar gegen de upstännschen Butjadinger un Stadlänner to Feld. Butjadingen tosamen mit dat Stadland weer to de Tiet noch dör de Heete, enen Münnarm van de Werser, van dat Fastland aftrennt, weer also ene Insel in de Wersermünn. Eerst um 1450 is de Heete dördiekt woorn.

Van 1499 bit 1514 woor Butjadingen van Graaf Johann V. innahmen un de Graafschup Ollnborg toslaan. De Butjenters kunnen dat aver bi ehre ne’e Herrschup dörsetten, dat ehr Asegabook, de ole frees’sche Gesettensammlung, wieterhen gellen de. Na de Midde van dat 19. Johrhunnert entstund lang de Wersermünn de 10 km lange Indstrie- un Havenstadt Nordenham.

An de Butjadinger Noordseeküst liggt de Noordseebäder Braav, Tossens un Langwarden.

Weblenken[ännern | Bornkood ännern]

Commons-logo.svg Butjadingen. Mehr Biller, Videos oder Audiodateien to’t Thema gifft dat bi Wikimedia Commons.