Espargos

Vun Wikipedia
Wesseln na: Navigatschoon, Söök
Sicht över Espargos vun de öörtliche Radarstatschoon ut.

Espargos (vun portugeesch: espargo „Spargel“) is de Hööftstadt vun’t Eiland Sal, een vun de negen bewahnten Eilannen vun de Republiek Kap Verde.

Geografie[ännern | Bornkood ännern]

Espargos liggt teemlich in’t Zentrum vun dat Eiland, direkt in’n Noorden vun den internatschonalen Flaaghaven Aeroporto Internacional Amílcar Cabral. De Hööftstadt vun Sal is mit 6.137 Inwahners (Bereken vun 2005) to tweetgröttste Oort op dat Eiland. Hier loopt al Straten tohopen: De Hööftverbinnen na Süüden geiht vörbi an’n Flaaghaven un den Ferienoort Murdeira bit na dat touristische Zentrum Santa Maria an de Süüdküst, wietere Straten verbinnt Espargos mit Pedra Lume an de Oostküst un mit den Haven vun Sal, Palmeira, an de Westküst. Över Sandpisten kann man ok wieter na’n nich bewahnten Noorden fohren.

De Stadt is sotoseggen rund üm de Huusbarg Monte Curral boot worrn, de ruchweg 107 Meter hooch is.[1] Rundüm is de Landschap flach un even, as dat tyypsch is vör Sal. De Tipp vun den vulkaanschen Barg is even maakt worrn. Dorop steiht vundaag de Radarstatschoon för den Flaagverkehr un ok en poor Sennenmasten, welke dat Eiland mit Rundfunk un Telefonnett versorgen doot. De Oortskarn liggt an de Süüdwestflank vun den Monte Curral. Dor steiht de öörtliche Kark, de Markthall un de Eilandverwalten.

Historie[ännern | Bornkood ännern]

Straat in’n Oortskarn vun Espargos

As de Eilannen vun Kap Verde in’n 15. Johrhunnert opdeckt un besiedelt worrn sünd, hett sik dat Leven op Sal toeerst mol an de Küsten entwickelt. Espargos is dorgegen noch teemlich jung un hett sik eerst to de Tiet vun’t Tweeten Weltkrieg entwickelt. 1939 harr sik Mussolini vun Portugal dat Recht sekert, op Sal en Dörgangsflaaghaven twüschen Europa un Süüdamerika to boen. Gegen den Enn vun’n Krieg hebbt sik in’n Noorden enige Barracken ansammelt, worut sik de Oort billt hett. Siether is Espargos düchtig wossen. Den Naam hett de Stadt vun den wildwassenden Spargel kregen, de rund üm den Oort utscheten deit, wenn dat denn doch mol Regen gifft. Eten kann man den aver nich.[1]

De Italieners hebbt sik ut dat Flaaghavenprojekt as Naklapp vun den Tweeten Weltkrieg gau wedder torüchtehn müsst, man de portugeesch Regeeren hett den Bo 1945 övernahmen. Veer Johr later weer dat en vull funkschoneerend Transitflaaghaven, de siether jümmers wedder verbetert un utboot worrn is.

Weertschap[ännern | Bornkood ännern]

Espargos stellt dat weertschoppliche Zentrum vun Sal dor, vun wegen dat dor in’t Hart vun Sal all Straten tohopen loopt un dor ok de Verwalten sitt. Egene Rohstoffen oder Produkschoonssteden hett Espargos aver nich. De gröttste Born för Innahmen stellt de Flaaghaven dor, de dat Eiland to en internatschonaal Dreihkrüz maakt hett un ok verantwoortlich weer dorvör, dat sik op Sal de Tourismus toerst entwickelt hett.

Borns[ännern | Bornkood ännern]

  1. 1,0 1,1 Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3


Koordinaten:16° 45′ N, 22° 57′ W