Murdeira

Vun Wikipedia
Wesseln na: Navigatschoon, Söök
Landkoort vun’t Eiland Sal

Murdeira is en Oort op dat Eiland Sal in de Republiek Kap Verde.

De Oort is noch bannig jung, as Murdeira eerst Mitt bit End vun de 2000er Johren för den opkamenden Tourismus boot worrn is. Liggen deit de Ferienwahnsteed ruchweg in de Mitt twüschen de Eilandhööftstadt Espargos un dat touristische Zentrum vun Santa Maria an de Küst vun de wiete Bucht Baía da Murdeira, wo ok de Naam vun afleidt is. För den Oort weer en Steed utsöcht, woneem de Küstenlien vun de langtogene Bucht noch mol en natürliche lütte Bucht as en Halfkrink opwiest. Dor binnen is dat Water vör den normalen Bülgenslag schuult, so dat sik disse lütte Bucht sünners good to’n Swemmen un Baden egent.

Murdeira besteiht to’n groten Deel ut Regen vun Apartmenthüüs un Hotels. As Anbott för de Touristen gifft dat hier Restaurants un Bars. Wokeen in Murdeira wahnt, dröff ok ahn Betahlen dat grote Swemmbad nütten, wat in’n Oort boot worrn is. Dor gifft dat ok en Poolbar. Tennisplätz sünd för de tokamend Tiet plaant. De Baía da Murdeira is butendem as Seeschuulrebeet utwiest un riek an Fischoorden.