Epizentrum

Vun Wikipedia
Wesseln na: Navigatschoon, Söök

Dat Epizentrum (gr.: epi „op, över“) is de geograafsch Positschoon vun en Eerdbeven.

Dat Epizentrum liggt pielliek över dat Hypozentrum, wat den egentlichen Eerdbevenherd betekent un stellt somit de Projekschoon vun’n Eerdbevenoort op de Eerdböverflach dor.[1] De Afstand twüschen Hypo- un Epizentrum warrt ok as Herddeep betekent.Wenn in de Narichten vun Eerdbeven snackt warrt, warrt tomeist blots dat Epizentrum angeven, wat den tomeist op Landkorten wiest warrt.

De Seismologen gaht bi’t Bestimmen vun Hypo- un Epizentrum tomeist dorvun ut, dat de Eerdbevenheerd en Punkt is. Dat is aver en Vereenfachen, vunwegen dat de Brookflach utdehnt is. Bi swacke Eerdbeven hett de Brook Längden vun wenige Meter bit ’n poor hunnert Meter, bi starke Eerdbeven kann de Brookflach aver ok mehrere hunnert Kilometers lang wesen. Dat Epizentrum is defineert as de Anfangspunkt, vun den de Brook utgahn deit un dormit de eerste Energie afstrahlt warrt.[1]

De Schadenswirken vun en Eerdbeven is in de Neeg vun’t Epizentrum normalerwies an’n gröttsten, vun wegen dat se mit Afstand to’n Eerdbevenheerd afnehmen deit. Man, in’n Enkelten hangt se ok vun de Geologie vun’t Rebeet af as ok vun de Herddeep un de Energieafstrahlen vun’n Eerdbevenherd. Sedimentbeckens künnt to’n Bispeel Resonanzeffekten utlösen, de to en düütlich gröttere Amplitude föhrt.[2] De gröttste Intensität mutt dorüm nich jümmer nipp un nau an’t Epizentrum vörkamen.

Borns[ännern | Bornkood ännern]

  1. 1,0 1,1 Peter M. Shearer: Introduction to Seismology, Cambridge University Press, New York 1999, ISBN 978-0-521-66953-5
  2. Edward A. Keller & Nicholas Pinter: Active Tectonics: Eartquake, Uplift, and Landscape, 2. Oplaag, Prentice Hall, Upper Sadle River (New Jersey), 2002, ISBN= 978-0-130-88230-1