Ecser

Vun Wikipedia
Wesseln na: Navigatschoon, Söök
Wapen/Flagg Koort
Wapen vun Ecser
Ecser
Laag vun Ecser in Ungarn
Basisdaten
Komitat: Pest
Lüttrebeet: Monor
Flach: 13,11 km²
Inwahners: 3.252 (2001-00-00 2001)
Inwahnerdicht: 248,1 Inwahners pro km²
Postleettall: 2233
Vörwahl: 29
Geograafsche Laag:
Koordinaten:47° 27′ N, 19° 20′ O
47° 27′ N, 19° 20′ O
Öörd in de Gemeen: 1
Börgermeester: István Harazin
Websteed: www.ecser.hu

Ecser ([ˈɛtʃɛr], slowaaksch Ečer) is en Dörp in dat Komitat Pest in Ungarn. Dat Dörp hett so bi 3250 Inwahners un liggt in de Ümgegend vun Budapest.

Geografie[ännern | Bornkood ännern]

Ecser liggt süüdoosten vun Budapest in de Neegd vun’n Flooghaven Ferihegy. De Naveröörd sünd Maglód un Gyömrő in’n Oosten, Vecsés in’n Süüdwesten un Üllő in’n Süden. in’n Noorden un Westen grenzt Ecser direkt an Budapest sien 17. Bezirk.

Historie[ännern | Bornkood ännern]

Toeerst in de Oorkunnen kummt de Oort an’n 15. Dezember 1315 vör. De Oort is aver woll al öller un stammt ut de Tiet, as de Ungarn na dat hüdige Land Ungarn kamen sünd. Na en ole Legenn hett de Fürst Árpád vun de Ungarn den Naam Ecser utwählt. As he na dat Dörp henkeem, do kunn em nüms seggen, wat de Naam vun dat Dörp weer. Do see Árpád, dat se dat Dörp vun nu af an na en Eek (ungaarsch cser), de dichtbi stünn, nömen schullen. To de Tiet, as de Törken in Ungarn dat Seggen harrn (1526-1686), hebbt de Inwahners dat Dörp all verlaten. Dat hett wohrschienlich ok mit de Belagerung vun Buda to doon hatt, de ganz in de Neegd weer. 1699 sünd denn wedder ne’e Lüüd na dat Dörp kamen. To Anfang vun dat 18. Johrhunnert hett de Herr vun dat Dörp, Graaf Antal Grassalkovich, Slowaken in Ecser ansiedelt un dat Dörp hett bet vundaag en slowaaksche Minnerheit.

Dat Buurnland vun Ecser, dat jümmer in de Hannen vun Landherrn legen harr, keem 1874 in Besitt vun de Buurn vun Ecser. De Iesenbahn keem in de Johren 1880. Stroom keem in de Johren 1930 bet 1932 na Ecser un dat eerste Telefon keem 1937.

De röömsch-kathoolsche Kark vun Ecser un de eerste School sünd 1740 boot worrn. Aver ok vörher al geev dat en Kark, de 1399 toeerst in de Oorkunnen vörkeem. Bi de Kark steiht hüüt ok en Denkmaal för de 52 Lüüd ut Ecser, de in’n Eersten Weltkrieg doodbleven sünd. Siet 1996 gifft dat ok en Denkmaal för de Doden vun’n Tweten Weltkrieg.

1947 sünd dör en Afkamen twischen de Tschechoslowakei un Ungarn 25 slowaaksche Familien vun Ecser na de Slowakei ümsiedelt worrn. In’n Uttuusch kemen Ungarn ut de Tschechoslowakei na Ecser. 1960 hebbt se in Ecser en landweertschopliche Kooperativ opmaakt. Mit de Johren 1960 un 1970 hett Ecser denn ok Ansluss an dat Watersystem, en ne’e School un en Kinnergoorn kregen.

Inwahnertall[ännern | Bornkood ännern]

1696 weer dat Dörp noch verlaten. Na 1699 hebbt sik 11 Familien in Ecser ansiedelt. Vun 1730 warrt seggt, dat dor 50 Familien levvt hebbt. En Register vun 1836 tellt 612 Katholiken in Ecser, dorvun weren 80 % slowaaksch un 20 % ungaarsch. Vundaag hett de Oort 3252 Inwahners (Stand 2001).

Wapen[ännern | Bornkood ännern]

Dat Wapen wiest de Kark vun Ecser, en Ekenboom un Lüüd, de den Volksdanz Hochtiet in Ecser danzt, de dree bedüdensten Symbolen vun’n Oort.

Politik[ännern | Bornkood ännern]

Ecser hett Partnerschoppen afslaten mit de Öörd Zlaté Klasy in de Slowakei un Kumbağ in de Törkie.

Verkehr[ännern | Bornkood ännern]

De Autobahn M0 löppt bi Ecser langs un de Iesenbahnlien 120 a (Budapest-Újszász-Szolnok) löppt ok dör dat Dörp.

Weblenken[ännern | Bornkood ännern]