Distrikt Veern
De Distrikt Veern (oder Arrondissement Veern) weer as Distrikt en Verwaltungsrebeed von dat Königriek Westfalen in de Franzosentied (1810-1811). De Seet weer Veern. Ünnerpräfekt weer Friedrich Georg Wilhelm Ostermeyer.[1]
Historie[ännern | Bornkood ännern]
Dat Rebeed hett vörher to dat Hertogdom Veern (Kurförstendom Hannover) höört.
An’n 1. März 1810 hett de König von dat Königriek Westfalen, Hieronymus, kund daan, dat dat Kurförstendom Hannover Deel von sien Königriek warrt. Westfalen weer en Vasallenstaat von dat Franzöösche Kaiserriek, dat siet 1803 dat Kurförstendom besett hollen harr.
Binnen Westfalen weer de Distrikt Veern een von de dree Distrikte in dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Distrikt Veern is oplööst worrn un dat Rebeed is opdeelt worrn op de Distrikte Bremen un Neenborg.
1813/1814 sünd de Franzosen slahn un dat Rebeed befreet worrn. Dat Kurförstendom Hannover is denn wedder herstellt worrn un de ole Stand von vör 1810 weer wedder dor.
Kantons[ännern | Bornkood ännern]
De Distrikt weer indeelt in ölven Kantons:[2]
- Kanton Achem
- Kanton Hudemöhlen
- Kanton Mattfeld
- Kanton Nee-Syke
- Kanton Oold-Syke
- Kanton Rethen
- Kanton Rodenborg
- Kanton Thänhusen
- Kanton Veern
- Kanton Wasra
- Kanton Wessen
Footnoten[ännern | Bornkood ännern]
- ↑ Augsburger Allgemeine Zeitung. 17. August 1810
- ↑ Bulletin des lois du Royaume de Westphalie. Königliche Bookdruckeree, Kassel 1810, Sied 19