Dietrich Bonhoeffer

Vun Wikipedia
Dietrich Bonhoeffer im August 1939[1]

Dietrich Bonhoeffer (* 4. Februar 1906 in Breslau[2], Neddern Slesien; † 9. April 1945 in dat KZ Flossenbürg[3]) is en lutherschen Theologen un en bekannten Vertreder vun de Kark vun dat Bekenntnis ween. He hett mitmaakt bi den düütschen Wedderstand gegen den Natschonalsozialismus[4].

Bonhoeffer hett sik mit 24 Johren habiliteert. Denn is he in't Utland ween un achterna Privatdozent for Evangeelsche Theologie in Berlin ween. Bi den Vorweser vun den Ökumeenschen Raat vun de Karken is he Referent for de Jöögd ween. Vun 1933 af an hett he sik apentlich gegen de Jödenfiendschop vun den Natschonalsozialismus stellt un is in'n Karkenstriet gegen de Düütschen Christen un gegen den Arierparagraphen gegenan gahn. Vun 1935 af an is he de Baas ween vun dat Predigerseminar vun de Bekenntniskark in Finkenwolde bi Stettin. Düt Seminar hett, later illegal, bit 1940 bestahn. Vun um un bi 1938 af an hett he bi den Wedderstand um Willem Franz Canaris mitmaakt. Vun 1940 af an dröff he nich mehr apentlich snacken un vun 1941 af an dröff he nix mehr schrieven. An'n 5. April 1943 is he in't Kaschott kamen un twee Johre later is he up persönlichen Befehl vun Adolf Hitler an'e Siet brocht wurrn. He weer dor en vun de lesten NS-Fiende mit, de henricht' wurrn sund, vunwegen datt se wat mit den Anslag vun'n 20. Juli 1944 to kriegen hebben schollen.

Gegen siene Lehrers over hett Bonhoeffer en egenstännige Theologie utarbeit'. He hett sunnerlik dor up henwiest, datt Jesus Christus mank de christliche Gemeende up de ganze Welt würklich dor is. De Bargpredigt un dat Gahn in Jesus siene Footstappen dö em veel bedüden. He meen ok, Gloven un Doon vun en Christenminschen möss tosamen passen. Dor hett he ok sülms na leevt. In siene Breeve achter Trallen hett he beschreven, wie dat in'e Tokumst mit de Ökumene an de Siet vund e armen Minschen utsehn konn un wie Bibel un Goddesdeenst ahn Religion begrepen weern könnt.

Kiek ok bi[ännern | Bornkood ännern]

Belege[ännern | Bornkood ännern]

  1. Dietrich Bonhoeffer: Bilder aus seinem Leben, Christian Kaiser Verlag, München 1986, ISBN 3-459-01613-2, S. 181
  2. Eric Metaxas, Bonhoeffer. Pastor, Agent, Märtyrer und Prophet, Holzgerlingen 42012 (2011), S. 29.
  3. Eric Metaxas, Bonhoeffer. Pastor, Agent, Märtyrer und Prophet, Holzgerlingen 42012 (2011), S. 665-558.
  4. Johannes Wallmann, Kirchengeschichte Deutschlands seit der Reformation, Tübingen 72012 (1973), S. 271.