Chrischan Wulff

Chrischan Willem Walter Wulff (* 19. Juni 1959 in Ossenbrügge) is en düütsch Politiker vun de CDU. Siet de 4. März 2003 weer he Ministerpräsident vun Neddersassen. An’n 3. Juni 2010 is he vun CDU, CSU un FDP as Kannedaten för de Wahl to’n Düütschen Bundspräsidenten upstellt wurrn. De Wahl hett he an’n 30. Juni 2010 mit eenige Möh achter sik bröcht. In’n drüdden Wahlgang is he denn aver wählt worrn un weer dor de jüngste Bundspräsident mit, den dat in Düütschland bit hüüt geven hett.

Vun’n Dezember 2011 an stünn Wulff jümmer mehr in de Kritik wegen den Verdacht vun Vördeelnahm, Verkehrtutseggen un Hinnern vun de Pressefreeheit. De Staatsafkaatschop Hannober hett in’n Februar 2012 beandraagt, Wulff sien Immunität optoheven, üm ermiddeln to künnen. An’n 17. Februar 2012 is he dorophen vun sien Amt as Staatshööft torüchpeddt.

Leven

Nah sien Schoolafsluss (Abitur) in Ossenbrügge hett he dornah in sien Heimatstadt noch Juristeree studeert un 1987 mit dat eerste juristisch Staatsexamen afslaten. 1990 hett he dat tweete Staatsexamen afleggt un is dornah Afkaat wurrn. Mit siene eerste Fru Christiane hett he een Dochter. 2006 hett he sik vun ehr trennt. 2008 hett he to'n tweeten Mal heiraadt. Mit siene tweete Fro Bettina Wulff (b. Körner) hett he en Söhn. Bovenhen hett se en Söhn vun en annern Mann mit in de Eh bröcht. Chrischan Wulff is kathoolsch.

Partei

Wulff is 1975 in de CDU intreden un weer vun 1978 bit 1980 Bundsvörsitter vun de Schölerunion. Vun 1979 bit 1983 weer he in’n Bundsvörstand vun de Junge Union. Vun 1984 af an höör he to’n Landsvörstand vun de CDU in Neddersassen. Siet 1994 is he dor Landsvörsitter vun un siet 1998 Viez-Bundsvörsitter vun de CDU in Düütschland. Vun’n 21. März 2003 af an hett he ok in’n Vörstand vun de Konrad-Adenauer-Stiftung seten.

Afornter

Siet 1994 is Wulff in de Landdag vun Neddersassen un is direkt wählt wurrn. Van 1994 bit 2003 weer he Vörsitter vun de CDU-Landtagsfrakschoon.

Annere Ämter, de Wulff utöövt hett

Chrischan Wulff is bi de Wahlen to’n neddersassischen Landdag 1994 un 1998 as CDU-Toppkannedat för dat Amt vun den Ministerpräsidenten antreden. He hett dor 36,4 % (1994) un 35,9 % (1998) för de CDU bi hoolt, is avers gegen den SPD_Kannedaten Gerhard Schröder nich gegenan kamen.

Man dat hett he denn bi de Wahlen vun 2003 gegen Sigmar Gabriel mit 48,3 % vun de Stimmen schafft. An’n 4. März 2003 is he dor denn to’n Ministerpräsidenten wählt wurrn. Dormols hefft de CDU un de FDP en Koalitschoon tohopenstellt. Wulff is Baas ween vun eene Regeerung mit seven Ministers vun de CDU un twee vun de FDP.

Vun Oktober 2006 af an is de Runn an Wulff kamen un he is Vörsitter vun de düütsche Ministerpräsidentenkonferenz wurrn. An’n 17. Oktober 2007 hett he sien Stohl dor wietergeven an Roland Koch ut Hessen.

Bi de Wahlen in Neddersassen 2008 hett de CDU wedder wunnen. Dormols is afsnackt wurrn, datt dat fuddergahn scholl mit de CDU/FDP-Koalitschoon unner Chrischan Wulff as Ministerpräsident. De CDU harr woll duchtig verlaren un bloß man 42,5 % vun de Stimmen kregen, man se is dor jummers noch de stärkste Partei mit ween. An’n 26. Februar 2008 is he wedder to’n Ministerpräsidenten wählt wurrn.

An’n 3. Juni 2010 is Wulff as de CDU/CSU/FDPKoalitschoon ehrn Kannedaten för dat Amt as Bundspräsident vörstellt wurrn. Vunwegen de grote Mehrheit vun de Koalitschoon in de Bundsversammlung is he (in'n drudden Wahlgang) ok wählt wurrn.^[1] David McAllister is Nafolger vun Wulff as Ministerpräsident vun Neddersassen wurrn.^[2]

Belege

Literatur

Fuhrer, Armin: Christian Wulff - Der Marathonmann. Olzog-Aktuell GmbH, München 2006, ISBN 978-3-7892-8167-9
Pruys, Karl Hugo: Christian Wulff - Ich mach mein Ding. Edition Q, Berlin 2002, ISBN 3-86124-559-0
Pruys, Karl Hugo: Christian Wulff. Deutschland kommt voran. Bebra Verlag, Berlin 2006, ISBN 978-3-89809-068-1

Weblenken

Op Wikiquote gifft dat Zitaten to, över oder vun „Christian Wulff“ (hoochdüütsch).

Websteed vun Chrischan Wulff (hoochdüütsch)
Staatskanzlei vun Neddersassen (hoochdüütsch)
CDU in Neddersassen (hoochdüütsch)
Chrischan Wulff in de Internet Movie Database (engelsch)

Bundspräsidenten vun de Bundsrepubliek Düütschland

[1] ttp://www.spiegel.de/politik/deutschland/0,1518,698585,00.html

[2] McAllister soll Wulff beerben, Spiegel-Online, 3 Juni 2010.

[1]

[2]