Staatshööft

Vun Wikipedia
Wesseln na: Navigatschoon, Söök
George Washington, de USA ehren eersten Präsidenten

En Staatshööft is de Person, de dat hööchste Amt in en Staat hett. He steiht for den Staat na buten un binnen in un is na dat Völkerrecht normolerwiese vullmächtigen Vertreder vun sien Land. Mit siene Unnerschrift sett he formal de Lüde in, de to en Staatsamt beropen wurrn sünd. Ok Gesette weert güllig, wenn he ehr gellen lett dör sien Unnerschrift. In Düütschland is in'n Momang Joachim Gauck as düütschen Bundspräsident dat Staatshööft.

In en Monarkie warrt dat Staatshööft dör Arv un Throonfolg bestimmt. Dor gifft dat allerhand Titels bi, as Kaiser, König oder Prinz. En Reeg vun Monarkien, as Malaysia wählt ehren Monarken for de Tied vun 5 Johre ut all de Sultans vun de Deelstaten. In Republieken warrt dat Staatshööft normolerwiese wählt, mag ween, direktemang dör de Wählers oder dör en Volksvertreden. De Titel heet denn tomeist Präsident. Neven dat franzöösche un US-amerikaansche Modell mit bannig mächtige Präsidenten, gifft dat ok annere Systeme, as in Düütschland, wo de Präsident meist man blot zeremonielle Upgaven hett, oder as in de Swiez, wo elk Johr en anner Liddmaat vun de Regeerung de Upgaven vun dat Staatshööft overnehmen deit un wo de ganze Bundsraat as Staatshööft ankeken weern kann. In en poor kommunistische Länner, as in Kuba un de vörmolige DDR weert de Upgaven vun dat Staatshööft utöövt dör den Vörsitter vun den Staatsraat. Bovenhen weer in en Reeg vun kommunistische Länner de hööchste Volksvertreden formell dat hööchste Organ in den Staat, so dat de Vörsitter vun dat Parlament as Staatshööft ankeken wurrn is.

In en Reeg vun Länner, as in de USA, is dat Staatshööft togliek Baas vun de Regeerung, In Düütschland is dat ganz anners, dor hett de Bundskanzlersche dat Seggen in de Regeerung. En tämlich eenmolige Position hett dat Staatshööft in de Nedderlannen, wo de König na dat Grundgesett Hööft vun de Regeerung is, man düsse Upgaven utöövt weert vun den Ministerpräsident.

De Prins Grootmeester vun den Souveränen Orden vun Sant Johann vun Jerusalem un Malta (de Malteserorden) hett den Rang vun en Staatshööft, ofschoonst de Orden gor keen Land mehr to regeren hett. De Orden warrt liekers vun allerhand Staten as en sülvstännigen Staat ankeken.

List vun Staatshööften[ännern | Bornkood ännern]