Amílcar Cabral

Vun Wikipedia

Amílcar Cabral (* 12. September 1924 in Bafatá, Guinea-Bissau; † 20. Januar 1973 in Conakry, Guinea) weer en kapverdischen Politiker un Unafhangigkeitskämper, de vundaag in de Republiek Kap Verde as Natschonalheld gellt.

Levensloop[ännern | Bornkood ännern]

Cabral weer 1924 in Bafatá as Söhn vun kapverdisch Öllern boren. Sien Moder Iva Pinhel Évora weer dem Vadder Juvenal Lopes Cabral na Guinea-Bissau nafolgt, de dor as Schoolmester arbeit hett.

As Amílcar Cabral acht Johr oolt weer, is de Familie na Kap Verde torüch gahn. De Havenstadt Mindelo op dat Eiland São Vicente, de vör ehr internatschonal Atmosphäär un apenen kulturellen Ümgang bekannt weer, is dat prägende Ümfeld vun Cabral worrn, de hier 1943 sien Schoolafsluss maakt hett. As Schöler hett he bi’n öörtlichen Rundfunk arbeit un schreev Gedichten un politische Schriften för’t Ünnerstütten vun en egen kapverdische, kreolsche Identität.

In dat doropfolgen Johr töög de Familie in de Hööftstadt Praia, wo Amílcar bit 1945 in de Natschonaldruckeree arbeit hett, bit he en Stipendium för en Studium vun de tropischen Landweertschap in Lissabon – de Hööftstadt vun de dormolige Kolonialmacht – kregen hett. In de afrikaanschen Studentenschap hebbt sik Zirkels mit politisch Telen billt, wo vele lateer Unafhangigkeitkämpers vun Kap Verde, Guinea-Bissau, Angola un Mosambik mit binnen weern. Na’n Afsluss vun sien Studium 1950 is he för twee Arbeitsjohr na Santarém in Portugal gahn.

1952 is Cabral as Landweertschapsingenör torüchgahn na Guinea-Bissau. Sien politischen Insatz bi de Buern hett aver de Kolonialregeeren nich geern sehn, so dat em bald de politische Polizei op’n Kieker harr un Cabral na Angola utneihn müss. Mit Aristides Pereira, sien Broder Luís de Almeida Cabral un annere junge Lüüd hett Amílcar Cabral 1956 de PAI grünnt, de vun wegen den verbiestert glieken Naam mit en Partei in’n Senegal aver kort dorna al ümnöömt worrn is in Partido Africano para a Independência da Guiné e do Cabo Verde (PAIGC, „Afrikaansch Partei för de Unafhangigkeit vun Guinea un Kap Verde“).

De Partei keem 1963 ut’n Ünnergrund togang un maak en Büro in’t Naverland Guinea apen, dat ünner Ahmed Sékou Touré en diktatoorschen, streng antikolonialistischen politischen Kurs verfolgen de. In’t lieke Johr, nadem en Streik vun de Havenarbeiters vun Pidjiguiti (Guinea-Bissau) dör portugeesche Kolonialtruppen blödig daalslahn weer, füng de PAIGC en Opstand mit Wapengewalt an, de sik to en Kolonialkrieg vun 1963 bit 1974 utwieten de.

Togliek dreev Cabral de politische Uteneensetten op internatschonal Even vöran. He hett de Saak vun Kap Verde un Guinea vör de Vereenten Natschonen vertreden, 1970 in en privat Gespreek bi Paapst Paul VI., vör europääsch Parlamenten, afrikaanschen Politikers un ok in de Medien. Sien antikolonialitische Positschoon in Verbinnen mit sien klor Bekennen to Blockfreeheit nich toletzt sien övertügend intellektuell Persönlichkeit hett em to en achten Partner vun de Sozialistischen Internatschonalen maakt, as ok to persönlich Frünnen vun Olof Palme un François Mitterrand.

Dat portugeesche Militär un de politische Polizei PIDE hebbt mehrmols versocht, Cabral dood to maken, so ünner annern in’n November 1970 bi en Överfall op Conakry, de as Portuguese Raid oder Mar Verde bekannt worrn is. De Akschoon harr to’n Teel Cabral un den guineischen Präsidenten Sékou Touré ümtobringen un de guineischen Kampflegers an’n Bodden tonichten to maken. Wiel Cabrals Fro Maria Helena un sien Kinner mit’n Schrecken dorvun afkamen sünd, hett dorbi de Familie vun en Dokter in de Naverwahnung swor Sehren lieden müsst un een Kind keem üm.

Af 1972 keem de portugeesche Kolonialarmee jümmer mehr in Bedrängnis un müss sik deelwies gau torüchtehen.

An’n 20. Januar 1973 geev dat en Putsch, bi den sik en Deel vun de Armee vun de PAIGC gegen de Kapverder an de Spitz vun de Partei oplohnt hett. Cabral un sien Fro weern vör jemehr Wahnung ophollen, man Amílcar Cabral wull sik nich fesseln laten un en Offizeer vun de Marine, Inocêncio Cani, schööt em dood. Opletzt hett dat Ingriepen vun’n guineischen Präsidenten un sien Truppen den Putsch hinnert. Ofschoonst de Mörders vun Amílcar Cabral bekannt sünd, bleven de Achtergünnen vun den Anslag bit hüüt in’n Düstern.

In de Maanden dorop kreeg de PAIGC de Kuntroll över den gröttsten Deel vun’t Land un verklor 1973 eensietig de Unafhangigkeit vun Guinea-Bissau.

De antifaschistischen Kräft hebbt an’n 25. April 1974 in de „Nelkenrevolutschoon“ tostannen brocht, dat sik Portugal vun en faschistische Diktatuur in en Demokratie wannelt hett. Dormit keem ok dat Enn vun den portugeeschen Kolonialismus, wat Tiet vun sien Leven dat Teel vun Cabral weer.

De Dag, an den Amílcar Cabral ümbrocht worrn is, is vundaag de Natschonalfierdag vun de Republiek Kap Verde.

Kiek ok[ännern | Bornkood ännern]

Websteden[ännern | Bornkood ännern]