A Midsummer Night’s Dream

Vun Wikipedia
Wesseln na: Navigatschoon, Söök

A Midsummer Night’s Dream (plattdüütsch so veel as: En Middsümmernachts Droom) is en Theaterstück van William Shakespeare van 1595 of 1596. Föörst afddruckt wörr dat 1600. Dat Stück is bet hüüt en van Shakespeare sien meestspeelt Warken met männi Adaptschoonen. Binnen A Midsummer Night’s dream hett Shakespeare dree Ebenen metenanner verwoven. Dat Stück is to glieke Tied ok een Speel met dat Speel.

MND title page.jpg

Worüm dat gait[ännern | Bornkood ännern]

Dat beginnt in Athen: Theseus schall gau Hippolyta frigen. Egeus hett sien Dochter Hermia na Demetrius hen beloovt. Na een ool Wett van Athen mag he de Bröögam utsöken. Wenn de Dochter dat neet will, schall se doodbliven. Man Hermia is wat dull in Leevde met Lysander. Theseus meent, wenn Hermia de Demetrius neet frigen will, schall se in de Orden van Diana binnenpedden. Hermia un Lysander nait tosammen ut. Füdder gait dat in een töversch Holt met Maanschien un een Mass Elvenlüüd. Oberon hett Stried met sien Fru Titania. De hett sik een indisch Wesselkind utsöcht. Met sien Deenstmann Puck will he Titania weer upp’n rechten Padd trügg wiesen. To glieke Tied sünd sess Handwarkslüüd in’t Holt een lütt Theaterstück Pyramus un Thisbe (na Ovid) bi to proven. Middelwiel sünd ook Demetrius un Helena in’t Holt lopen: Demetrius upp Söök na Hermia un Helena achter hüm ran. Puck verwannelt Bottom in en Esel. Oberon seggt Puck, he schall en Töverblaam halen. Puck vertövert Lysander, dat he sik in Helena verkiekt. Oberon vertövert Demetrius, dat he sik ook in Helena verkiekt. Met de Töverblaam löppt Puck ook na Titania hen, de jüst bi to slapen is. He strakelt hör met de Blaam över de Ogen un seggt en Sprook: "What thou seest, when thou dost wake, do it for thy true love take". As Titania wack warrd, kümmt hör jüst even Bottom as Esel inne Mööt un se is strax in Leevde met hüm. Wiel Titania de indischen Fent fri gifft, maakt Oberon de hele Töveri trüggels. Denn gifft dat glieks dreemaal Bruutloop in Athen: Demetrius is nu in Leevde met Helena, Hermia draff Lysander, un Theseus gait Hippolyta frigen. De Handwerkslüüd kaamt upp de Hochtied un speelt Pyramus un Thisbe. An'n Slutt kümmt noch eens Puck un bedankt sik bi de Tokiekers.

Johann Heinrich Füssli - Titania liebkost den eselköpfigen Bottom.jpg

Personae[ännern | Bornkood ännern]

De Lüüd ut Athen:

  • Theseus, Hartog van Athen
  • Hippolyta, Köningsche van de Amazonen, beloovt met Theseus
  • Egeus, Vadder van Hermia
  • Hermia, in Leevde met Lysander
  • Lysander, in Leevde met Hermia
  • Helena, hett Demetrius leev
  • Demetreus, schall Hermia frigen, man hett later Helena leev
  • Philostrate, Meester van de Zeremonien an Theseus sien Hoff

Dat elvisch Folk:

  • Oberon, Köning van de Elven
  • Titania, Köningsche van de Elven
  • Puck, ookso nöömt Robin Goodfellow, Deenstmann van Oberon
  • Een Koppel Elven, de Titania to Deenst sünd

De Handwarkslüüd:

  • Peter Quince, Timmermann
  • Nick Bottom (de Naam bedüüt Bodden, man ok Köppke un Maars)
  • Francis Flute
  • Robin Starveling
  • Tom Snout
  • Snug

Adaptschoonen un Wirken[ännern | Bornkood ännern]

Van dat Stück A Midsummer Night’s Dream finns veele Vertalen un Adaptschoonen. Daar gifft dat ook Musicals un Films (1999 van Michael Hoffmann) ünner. Bekannt is Felix Mendelssohn sien Musik Ein Sommernachtstraum. In dat hochdütske Vertalen van August Schlegel heet Bottom Zettel. Daarvan inspereert is Arno Schmidt sien Booknaam Zettels Traum. Upp Plattdüütsch gifft dat een Adaptschoon van Holger Jansen as Höörspeel Mittsommernachtsdröömen. Een Middsümmernachtsdroom was 1999 dat föörst Stück van dat alternative Shakespeare-Theaterfestival (1999-2009) van de neddersassischen Kring JANUN e.V..