.cat

Vun Wikipedia

.cat is de Topplevel-Domään (TLD) för Internettsieden to katalaansche Spraak un Kultur. Dat is ene generische un sponserte TLD, dat heet, de Stichten Fundació puntCAT hett dat Leid över de Domään un dat Recht, de Domään .cat to bruken, hängt dor vun af, dat de Stichten tostimmt. För dat Tostimmen is dat nödig, dat de Websteed op Katalaansch is oder sik mit de katalaansche Spraak un Kultur uteneen setten deit. .cat is also de eerste TLD, de för ene kulturelle un Spraak-Gemeenschop opricht worrn is, de sik ok nich na Lännergrenzen richten deit.

Historie[ännern | Bornkood ännern]

De Katalanen wullen al länger ene egene Domään hebben, de utwiesen schull, dat se en egene Identität hebbt un nich blot Spanier sünd. Dorüm wullen se toeerst ene Lännerdomään för dat autonome Rebeet Katalonien binnen Spanien hebben, ünner de Domään .ct. Doch dat wull toeerst mal de Staat Spanien nich mitmaken, de wullen de territoriale Integrität vun dat Land bewohren un nix ünnerstütten, wat de Lüüd bestärken kunn, Unafhängigkeit intofordern. Ok de ICANN seed, dat se dat nich ünerstütten kunn, kunn Katalonien as autonom Rebeet doch nich as richtigen Staat gellen. De Katalanen hebbt denn de Idee ännert un wullen nu keen territoriale Domään mehr, man ene kulturelle. Dor schullen nu ok de Katalanen buten dat autonome Katalonien tohören, in Frankriek, in Italien, op de Balearen, in Valencia un överall ans op de Welt, woneem katalaansche Spraak un Kultur to finnen is. De ganze Domään-Idee vörandrieven dee Amadeu Abril, en Katalanen, de ok bi de ICANN as Direkter mitarbeiden dee. In dat Johr 2000 hett de ICANN dat eerste Maal dor to opropen, Vörslääg to maken, wat för ne’e Domääns inricht warrn schöölt. Abril harr al de katalaansche Domään in’n Sinn, doch he seet noch bi ICANN in dat Direktorium un so wull he den Vörslag nich maken. Vun wegen Befangenheit un so. Eerst 2004 hett de ICANN dor denn wedder to ne’e Domään-Vörslääg opropen. Abril weer nich mehr Direkter un hett nu den Vörslag inbröcht. De Idee is mit mischte Geföhlen opnahmen worrn. Vele weren bang, ICANN möök Pandora ehr Büss apen, wenn se ene kulturelle Domään akzepteren dee. Doch Abril siene Argumenten möken bald kloor, dat ICANN de Domään goodkennen kunn, ahn willen Natschonalismus, Separatismus un Partikularismus de Döör optomaken.

In’n September 2005 hett ICANN toseggt, dat .cat as Domään inricht warrn schall. Vun’n 13. Februar af an bet to’n 21. April 2006 kunnen Domääns vörmarkt warrn un an’n 23. April weer de Domään freeschalt un vun nu af an kunnen Domääns ahn Vörmarken registreert warrn.

Dat sünd nu (Stand Juli 2006) üm un bi 15.000 Domääns ünner .cat registreert.

’Keen .cat-Domääns registreren dröff[ännern | Bornkood ännern]

De Domääns sünd alleen för Lüüd, de Sieden op Katalaansch oder över katalaansche Kultur in’t Internett stellen wüllt. Dorüm dröfft de .cat-Domääns nich eenfach so registreert warrn, man de Stichten Fundació puntCAT kickt jümmer na, wat ok würklich katalaansche Saken op de Sieden opstaht. Vun wegen dat cat ok dat engelsche Woort för Katt is, harrn ok Lüüd an de Domään Intress, de Websteden över Katten hebbt. Dat is aver nich verlöövt, solang de Kattensiet nich op Katalaansch is oder sik mit de Katt in de katalaansche Kultur uteneensetten deit. Dat sülve gellt för Websteden, de mit Kataloge to doon hebbt (engelsch catalogue).

De Regeln, ’keen ene .cat-Domääns kriggt, sünd:

  • Lüüd, de al ene Websteed op Katalaansch hebbt.
  • Lüüd, de ’n speziellen Kood angeven köönt, den de Stichten an bestimmte Institutschonen rutgifft.
  • Lüüd, de vörwiesen köönt, dat dree annere Lüüd oder ene Institutschoon, de al ene Domään hebbt/hett, em oder ehr ünnerstütten doot.


Weblenken[ännern | Bornkood ännern]