Zoo in de Wingst
De Zoo in de Wingst liggt bi’n Oort Watermöhl in de Wingst in Neddersassen. Se hebbt Wild- un Huusdeerten, welke dorvun ok för de Kinner to'n Anfaten.
De Deertenhannel Ruhe hett den Zoo an’n 22. Juni 1972 as Baby-Zoo grünnt. De Zoo hett junge Deerten, de annerwegens toveel weren oder kene Öllern harrn, optagen un denn wedder an annere Zoos afgeven. In de 1990er Johren föhren ne’e Gesetten un de lütten Geheeg to’n Konkurs vun den Zoo. Ok dat de annern Zoos jümmer mehr op egene Optucht vun de Jungdeerten setten deen, hett den Zoo tosett. De Gemeen Wingst hett den Zoo denn övernahmen un em vun dat Johr 2000 an nee inricht. Nu warrt nich mehr jungen Deerten vun Minschen optagen, man dat gifft normale Gruppen vun Deerten bi de de Jungen bi ehr Öllern opwasst. De Zoo is veer Hektar groot. 2007 is dor noch en twee Hektar groot Stück Holt tokamen, in dat Boren un Wülv leevt. De Wülv sünd ut’n Tierpark Berlin in de Wingst kamen. De Boren hebbt dor ok vörher al leevt un sünd blots in dat ne’e Geheeg ümtagen. 2017 harr de Zoo knapp 70.000 Besökers.[1]
Dat Aquarium in’n Zoo is 2013 slaten worrn.
To de Deerten, de in den Zoo leevt, höört Sibiirsche Tigers, Bruunboren, teihn Soorten Apen, Waterswien, Schildpadden, Flamingos, Känguruhs, Fischotters, verschedene Soorten Vagels unner Veehtüüch so as Esels, Schaap oder Zegen.
Footnoten
[ännern | Bornkood ännern]- ↑ Hoffnungsstreif am Horizont. Gemeinde setzt in Sachen Fahrstuhl auf Hilfe der Samtgemeinde, Niederelbe-Zeitung an’n 20. April 2018, Sied 7
Weblenken
[ännern | Bornkood ännern]
- Websteed vun den Zoo (hoochdüütsch)
Koordinaten:53° 44′ N, 9° 4′ O