Zellwand

Vun Wikipedia
Wie de Zell vun en Planten upboot is, gröön is de Zellwand.
Bakterienzelle (geel: de Zellwand)

En Zellwand is en Hüll um de Zellen vun Planten, Bakterien, Swämme, Algen un allerhand Archaeendeerter umto. Se is tohopensett ut Polymere. Deerter un Protozoen hefft keen Zellwänn. De Zellwand liggt buten vun de Zellmembran, de um dat Binnerste vun de Zellen umto sitten deit. De Zellwand gifft Stebigkeit un Schuul un warrt ok as Filter for de Zellen bruukt. En vun de sunnerlichen Upgaven vun de Zellwand is, datt se as „Druckfatt“ bruukt warrt: se sorgt dor for, datt de Zellen nich platzen deit, wenn bi de Osmose Water rinkamen deit.

Wat de Zellwand ehre Upgaven sünd[ännern | Bornkood ännern]

Bi allerhand verscheden Organismen hefft de Zellwänn den lieken Sinn. Se geevt de Zellen sture Stebigkeit un schuult se dor gegen Druck un Stoot mit. Bi Veelzellers maakt se mööglich, en Form up to boen un de to beholen (Morphogenese). De Zellwand kann ok grote, unner Umstänn giftige, Moleküle dor vun afholen, in de Zellen intodringen. Bi de Osmose hölpt se dor mit to, datt dat Milieu stabil blifft un nich to veel Water upnahmen warrt. Se kann ok sülms Water spiekern. Wie de Zellwand tohopenboot is, ehre Form un Egenaard könnt sik verschelen in de unnerscheedlichen Tieden vun dat Zellleven un hangt dor ok vun af, wie de Umstänne sünd.