Wladimir Afanassjewitsch Ljachow

Vun Wikipedia
Wladimir Afanassjewitsch Ljachow

Wladimir Afanassjewitsch Ljachow (russisch: Владимир Афанасьевич Ляхов, wetenschaplich Transliteratschoon Vladimir Afanas'evič Ljachov; ukrainsch: Володимир Панасович Ляхов, wetenschaplich Transliteratschoon Volodymyr Panasovyč Ljachov; * 20. Juli 1941 in Antrazyt, Ukrainsche SSR; † 19. April 2018 in Astrachan) weer en sowjeetsch Kosmonaut.

Ljachow hett 1964 de Utbillen an en Akademie för Militärpiloten in Charkow afslooten. An' 7. Mai 1967 wurr he as Kosmonaut utwählt.

Ljachow hett dree Ruumflüüg maakt. Sien eerste Mission weer 1979 Sojus 32. Hier weer he as Kommdant insett. Tosommen mit den Bordingenieur Waleri Wiktorowitsch Rjumin bill he de darte Stammbesetten vun de Ruumstatschoon Saljut 6. Dorbi wurr ok en Butenbordinsatz maakt. Insgesamt bleven se bi disse Mission 108 Daag un 4 Stünn in' Weltruum.

De nächst Mission vun Wladimir Ljachow weer Sojus T-9 in dat Johr 1983. Bordingenieur weer ditmal Alexander Alexandrow. Ljachow un Alexandrow harrn tosommen mit Wiktor Sawinych all de Ersatzmannschap vun den spoodlosen Floog Sojus T-8 bild. Up Sawinych wurr ditmal Mal affsehn um mehr Drievstoff an Bord nehmen to können, wat en Rendezvous in en höhgere Umloopbahn mögelk maken dee. Teel vun disse Mission weer de Ruumstatschoon Saljut 7. Ditmal weer de Mannschap ruch weg 146 Daag un 10 Stünn in't All. De Missionsdüer vun 149 Daag weer woll kien Langtietrekord för Kosmonauten, aber för dat Sojus-Ruumschipp. Tovör harr Sojus T-7 mit 113 Daag dissen Rekord hollen.

Sien letzt Mission weer denn 1988 Sojus TM-6. Up den Henfloog to de Ruumstatschoon Mir weern de Wetenschapskosmonauten Waleri Wladimirowitsch Poljakow un Abdul Ahad Mohmand ut Afghanistan sien Kollegen. Polkakow is denn up de Statschoon bleeven, wiels Ljachow un Mohmand alleen torüchflaagen sünd. Ditmal düer de Mission 8 Daag, 20 Daag un 26 Minüüt.

Insgesamt weer Ljachow 333 Daag, 7 Stünn un 47 Minüüt in't All. An' 7. September 1994 gung he in den Ruhestand.

Ljachow weer verheiraadt un harr twee Kinner.

Weblenken[ännern | Bornkood ännern]