Wikipedia Diskuschoon:Sass

Ik hebb över uns Problem mit de Schrievwiesen nochmal nadacht. Ik glööv, dat Problem liggt dorin, woans een Spraak opfaat. Dor gifft dat twee Ansätz:

• Spraak is en Middel, en Medium, Weten un Kultur rövertobringen, kannst seggen en Kommunikatschoonsprotokoll oder en Interface.
• Oder: De Spraak sülvs is Kultur un maakt dormit en groot Deel Weten ut.

De mehrsten Enzyklopädien bruukt de Spraak ehr as Middel. Spraak mutt eendüdig un nich missverständlich wesen. De Informatschoon mutt röverkamen un alle Spraakkapriolen, de nich nödig sünd, de Informatschoon rövertobringen, sünd to vermeiden. Dialektveelfalt maakt dat unnödig swoor, de essentiellen Informatschonen licht optonehmen.

Nu kann een seggen: De plattdüütsche Wikipedia is keen „normale“ Enzyklopädie. Se hett de plattdüütsche Spraak wählt, ofschoonst de hoochdüütsche Spraak veel beter is, de Informatschoon rövertobringen. Denn so temlich alle Plattdüütschen köönt Hoochdüütsch. Un wenn nich, denn köönt se Nedderlandsch. Dat Plattdüütsche is also en unnödig Hinnernis, wenn dat üm dat reine Vermiddeln vun Informatschoon geiht. Wenn een dat so süht, denn kann een dor twee Konsequenzen ut tehn: Wi maakt gor keen plattdüütsche Wikipedia, is ja nich nödig, wenn'n Hoochdüütsch verstaht. Oder: Dat geiht gor nich mehr so sehr üm dat Enzyklopädieprinzip. Wi geiht na den baven nömten Punkt twee un wi seht de Spraak as en Kulturgood. Denn sünd Spraakkapriolen, Spraakveelfalt tolaten. Denn is ok Dialektveelfalt positiv, Kultur leevt vun Veelfalt. Aver dat is ok keen richtige Lösung för dat Problem. Denn sünd wi nich mehr bi en dröge Enzyklopädie, de dat Weten stracks in'n Bregen vun'n Leser schüffeln schall un nix anners, denn sünd wi bi en Projekt, dat mehr mit Kunst un Literatur to doon hett. Mit annere Wöör: Wi sünd keen Enzyklopädie, keen Wikipedia mehr. Denn sünd wi en Krink för Schrieverslüüd, de lütte Sakentexten schrievt, aver ahn enzyklopädischen Ansprook.

Dat is en astrein Dilemma. Tominnst, wenn een dat stuur un konsequent toenn denkt.

As ik op nds.Wikipedia anfungen bün, hebb ik dacht, dat ik villicht na een Tiet ganz vun de de.Wikipedia op nds schifte. Dor bün ik nu wiet vun weg. Fakener denk ik, ik laat dat ganz wesen.

Villicht mööt wi nochmal in'n Grundsatz över de Rull vun de nds.Wikipedia nadenken. Wat schall uns Wikipedia wesen? Een vun de beiden vörstellten Radikalpositschonen oder schöölt wi en Middelweg gahn? Woans schall de utsehn? Wat is unse Rull? Dat is en wichtige Diskuschoon för de Dialektfraag, ahn de disse Fraag nich antert warrn kann.

(Sorry för den negativistischen Toon.)

--::Slomox:: >< 17:10, 21. Dez 2005 (UTC)

Moin Slomox, toeerst mal will ik Di vun Harten Dank seggen för all de Tied, de Du in disse Wikipedia rinsteckst. Ik mark dat bi all de Saken, wo Du oppasst, dat Vandalismus gau wedder rutkummt un bi all de afhakten Ännermarken in de List vun de letzten Ännern. Un dat Du nadenkst, dat villicht ganz ween to laten, dat maakt mi trurig, ahn Di kann ik dat ok nich maken.

Wat de twee Extrempunkten angeiht, denk ik mi, dat dat Teel ween schall, 'n Enzyklopädie to maken. Letzebuergisch hett dor t.B. al veel tosamenkregen. Un wat dor ok 'n groot Problem bi is, is dat dat vele Saken gifft, wonehm dat op Platt keen Wöör för gifft, oder wonehm een lang na söken mutt. Un ik denk mi, datt plattdüütsche Wikipedia dor ok 'n wichtigen Bidraag för de plattdüütsche Spraak is: nämli disse Wöör ruttofinnen un dat hintokregen, dat annere Lüüd disse Wöör ok finnen köönt.

'n Enzyklopädie is keen Sabbelrunn för Schrieverslüü vun plattdüütsche Dööntjes, 'n Enzyklopädie is 'n Enzyklopädie.

Un villicht mööt wi dat 'n beten beter koordineren, wat wi schrifft. Af un an denk ik mi, dat de Barg vun Arbeit veel to groot is un dat wi ja jümmers noch bloots so'n lütte Koppel Lüüd sünd. Un an annere Dagen frei ik mi, wenn weder Gerold oder Termo oder Du wat schrieven hett. Ik hebb bloots vunwegen mien Arbeit (mien Job) nich so veel Tied as ik geern hebben will. Un ik denk mi, dat is mit annere Lüüd ok so. Villicht gifft dat ja 'n Rebeet, wat wi tosamen planen köönt, so as de Vörlaag vör de Lännerinfoboxen oder de Mathematik oder so. Villicht föhlt een sik dann nich so allen. Ik hebb mi ok dacht, dat weer goot, mal ins-presse.de antoschrieven oder de fehrs-gilde. Man ik hebb vunwegen mien Arbeit noch nich den Kopp free hett, dor mal wat optosetten. Villicht köönt wi dor ok noch mal in 'n privaten Nettbreef över snacken?

Un wat mi warklich argert, is dat alle poor Weken wedde der wen kummt un Striet över de Schrievwies maakt. Un elk een will dat wedder anners hebben. Un (blots mal so nadacht), wenn een dat so maken deit as de Rügener, denn is wedder Johnny ut Stade nich tofreden. Dat hett allens keen Sinn. Dat gifft al 'n Kompromiss un dat is de Sass.

Hartlich Gröten, HeikoEvermann 18:40, 21. Dez 2005 (UTC)

Kene Angst, wenn ik över dat wesen laten nadenk, denn besinn ik mi na en Tiet wedder ;-) Ik dank di ok för den Gummibär!

Lëtzebuergesch is keen good Bispeel: De hebbt en Orthografie besloten. Limburgs oder Allemannisch passt beter.

De Idee achter mien Indrag baven is, dat vele Lüüd (so is mien Indruck) dör de vörgevene Schrievwies afschreckt warrt. Op de annere Siet is de Schrievwies nödig. Woans köönt wi de Lüüd dat verkloren? Argumenten sammeln un op ene Siet präsenteren? Wenn dat mehr as twee Sätz sünd, leest dat doch keeneen mehr dör. Dat maakt keen Spaaß, wenn du bi jeden ne'en Bruker wedder dat sülve vertellen un verkloren musst, wat de Grünn för Sass sünd. Denn maakst dat doch, un de Keerl is al weg un warrt nich wedder sehn. (Aver mien Klagen hett ja ok keen Sinn, du kennst dat un Ideen, dat Problem to lösen, weet ik nich)

Dat mit dat Koordineren is en gode Idee, aver mien Problem is jümmer: ik hebb keen Utduer :-( Ik maak hier wat, ik maak dor wat, aver ik krigg dat nich hen, en längere List to nehmen un de denn afarbeiden. Na en Stoot warrt mi dat to ööd. Dor bruukst du annere Brukers, de dat beter köönt ;-)

Wat schall den in den Breef an INS un de Fehrs-Gill binnenstahn? --::Slomox:: >< 03:05, 23. Dez 2005 (UTC)

Scharven bringt Glück!

Leeve Marcus un Heiko,

Jii hevvt Jau jo woorig wat utdöcht tou Wihnachen!

Nu stoht Jii vöör Jaun Hümpel Scharven un weit ne meihr recht wieter. Dat müss woll all laang mol ween, wat Jii över dennen Kroom in‚t Nodenken koomt.

Ick haar van Anfang docht, de NDS wöör ‚n Ergänzen tou de ‚grouten’ Wikis- mit Sooken, de ‚n anners ne tou finnen weeit, mit Themens, de eein Betoch tou de Reschioon, tou Land un’ Lüü hett. Laang vöör Jau hebb ick all mien eierste Artikels schreeven, un hebb mii an eein Orthogrophii (teemlich dicht bii SASS) houlen, van dee ick meeint hebb, wat se ouk anner Lüü lees’n un’ begriepen kunnen.

Man- ick hebb mii ouk freut, wenn ick Oostfreesenplatt or Münsterlanner Platt funnen hebb, in jemmer Munoort schreeven. Wenn ‚t mii tou dull weer, bün’ck gänzli bigohn un’ hebb jem översett’- man: JÜMMER as Ergänzen, oon’ jem twei tou moken!!!!

Dat hett ouk recht gout gohn, bit hen tou dennen Dag, as door ‚n poor Radikool’n jemmer Ietelkeeit utleeb’n wull’n. Intoleranz, Dickköppigkeeit un’ Scharpmookereei güng nu ennig lous. Dat weeir ‚n Mallöör! Door weeir mii kloor, dat waard de Anfang van ‚n Innen.

De Nedderlanners hebbt ‚s ruutökelt, de ölleren Plattsnackers (door mang Schrievers, de meeihr Weeiten van Platt hebbt as aal de Lüü, de sick as ‚native’ Snackers beteiken douht, mii sülbst door tou höörig) wüür’n tou Idiouten un’ Separatisten affstempelt. Kritik möögn ‚s amend ne!!!!

Ick froog Jau- wosou hebbt Jii sou laang bruukt, dat tou begriepen???

Man- nu’ denkt joo ne, ick wull Jau jüst un’ alleein an ‚t Beein miegen. Door givvt heel keein Verdouhn: Jii mookt Jaun Arbeid goud! Ohn’ Jau löppt dat amend ne. Jaun Kunnigkeeit van ‚administrativa’ is allerbest, un Jaun Platt is ouk recht ennig worrn. Man- Jaun Glööv, de Heben haar Jau uutkeeiken, de nedderdüütsche Welt tou verbeetern, de höört sick ne. Dat is meist Blasphemii, door sünd Jii ne Manns naugh föör.

Jii hebbt avers noch eein Schangse: bliivt bii SASS as Grondloog, obers geevt de Lüü sou veel Bott as ouk SASS jem geeven wull! Bevöör wat Jii annern Kroom as wiktionary.nds or gänzli’ Matheplatt anfangt (Heiko, don’t worry!) mookt hier de Döör’n wiit open föör aal dei Lüü, de door Lust tou hebbt.

Schriivt de Lemmata nipp un nau no SASS- man jümmer mit ‘n Dwarsverwiisen no anner Schrievwiisen. Dat is woll ‚n heeil Bült Arbeeid, man door geiht keein Wech ümhin. ‚Vor den Erfolg haben die Götter den Schweiß gesetzt!’

Tjer- un’ nu tou de Themen. Mii dücht, ouk door schull in dennen Middelpunkt aal dat stohn, wat ‚n Nedderdüütschen interseer’n deiht: Land und Lüü, Geographii, Uut oule Tiiden, Bruukdoum etc.- man jümmers mit Betoch tou de Rebeeden, woneem de Sprook noch leben deit.

Man- ouk hier schull ‚t keein Dogma waar’n- blouts: wat wöllt de Lüü, de opp Platt wat söken douht? De verscheeiden Stamm’ssproken van Afghanistan woll tou allerletzt, man eein Verkloorn van de ‚Teelacht in Nörn’ kunn opp Platt beter utseihn as op Houghdüütsch. Jii schulln Jau woll wat wunnern, wat door ‚n Bült Lüü Spooss an harr’n, mit tou moken. Door kunn oppletzt ‚n Fundgrouv’ van waar’n!

Marcus, Du schreeivst: „Wi sünd keen Enzyklopädie, keen Wikipedia mehr. Denn sünd wi en Krink för Schrieverslüüd, de lütte Sakentexten schrievt, aver ahn enzyklopädischen Ansprook.Dat is en astrein Dilemma. Tominnst, wenn een dat stuur un konsequent toenn denkt.“ Loot dat veele Dinken no, Jungkeeirl ;-)! Du packst Dii door tou veel Eiers ünner! Loot dat doch loupen un’ kümmer Dii meihr üm dennen Schiit, de sick dor mang slieken will. Dat hesst Du bithertou wunnerboor mookt. Du muttst joo nich aaln’s sülbst schrieven, blout üm door jichenseein Etmool vull tou mooken.

Un’ denn: „De Spraak sülvs is Kultur un maakt dormit en groot Deel Weten ut.“ Wenn Du dat man jümmer seggt un’ docht haarst, weeirn Jii all ‚n gouden Innen wieter, glööv ick.

Heiko, Dii will ick ouk noch wat in Diin ‚Bouk’ schriiven: Du mookst jümmer dennen Indruck as weeirst Du ‚n Oort van Diktoter, hier op NDS. Verstooh mii ne verkeeirt- wat Schiet is, mutt inne Tünnen! Man- goude Artikels, in goud Platt schreeven (kiek no ‚Rügen’) eeinfach tou schuul’n, wieldes Dii de Sprook ne passt, geiht ne, amend ne! Door 'n Schrieverskriig uut tou mooken is alberich! Sett em no achtern un’ schriiv Diin SASS-Verschoon door vöör. Dat weeir fair un’ seeigh meeir no ‚Zivilisatschoon’ un’ ‚n ennige Kinnerstuuv uut. Elkeein reschionaale Idiolekt hett siin Recht, ‚n Baarg meeihr as dat leidige Korsett van SASS. Dat lett sick aaln’s mooken, wenn Jii man blouts wull’n un’ ne sou wranterig weeirn!

Ick wünsch Jau aaltohaup ‚n goud’ Wihnachsfest un’ ‚n gesund’ Neujoor!--fidi 15:01, 23. Dez 2005 (UTC)

Wenn du denn Indruck kregen hest, wi staht vör en Hümpel Scharven, denn is dat verkehrt. Ik wull blot en Diskuschoon anstöten, Vörslääg to finnen, woans dat geiht, Sass beter rövertobringen. Wi hebbt wisse Problemen, dat süht jeedeen. Dat schall hier ok keen Diskuschoon wesen över de Inholten. Över wat een en Artikel schrifft, dat is den sien Saak. De Themen en beten afsnacken is seker sinnvull, aver blot kene Vörgaven maken. Dat schall hier aver nich op'n Disch kamen.

Ik nehm mi nu mal dien letzten Satz (hett keen speziellen Grund, weer de eerste, de mi ünner de Muus kamen is). Wi nehmt mal an, de Satz steiht in en Artikel. Du schriffst Ick wünsch Jau aaltohaup ‚n goud’ Wihnachsfest un’ ‚n gesund’ Neujoor! In Sass weer dat Ik wünsch jo alltohoop ’n good Wiehnachtsfest un’n gesund Neejohr!. Dat is nau dat sülve, blot mit eenheitlich Orthografie un so för en Minsch, de fakener Platt leest, vertroot, denn temlich vele Schrieverslüüd bruukt Sass (tominnst as Basis). Ik glööv nich, dat dien Regiolekt dorbi in Gefohr is. Versöök mal de Tiet to stoppen, de du bruukst, 'n hoochdütschen Text to lesen, de korrekte Orthografie bruukt, un denn een, de den Text na de Luden weddergifft, aver kene Orthografie folgt. To'n Bispeel sowat wi: Ich hole den Hund herein. un ich hoolä dehn hunnt härraihn.. Den verkehrt schrevenen Text to lesen, duert veel länger. För en Enzyklopädie is dat op't best, wenn mööglichst veel Informatschoon in mööglichst wenig Tiet vermiddelt warrt. Ik segg ja nich, dat all'ns, wat regional is, glieks slecht is. Wenn in de Region annere Wöör bruukt warrt (so as Eerdappel staats Kantüffel oder Sätz mit man staats Sätz mit aver un solke Saken) is dat okay, solang nich de Mehrheit vun de Leser blot noch „???“ denkt. Dat schall nich all'ns een Bree warrn. Nich dat Vokabular schall lütter warrn, blot de Variantenveelfalt bi een un dat sülve Woort. Kloor, wenn en Artikel wiet vun Sass af is, denn is de Gefohr grötter, dat ok solke Saken mal mit afännert warrt, dat kummt vör.

Du giffst mi den Raat, nich to veel to denken un dor hest du seker ok nich unrecht. Aver ganz ahn Denken lööst sik de Problemen ok nich ;-)

Du seggst ok Dat müss woll all laang mol ween, wat Jii över dennen Kroom in‚t Nodenken koomt. Dat kummt nich opmal, dat hebbt wi vun Anfang an, glööv dat oder nich ;-) De Problemen weren mi al lang kloor, aver ik hebb woll den emotionalen Wedderstand nich so groot inschätzt un hebb dacht, dat de Argumenten, de mi temlich düüdlich düchen, ok för annere düüdlich sünd. Dat hett sik wiest, dat dat nich so weer. Ik hebb mien eersten Indrag mit Afsicht temlich apen formuleert. Ik hebb aver ok nu keen Twiefel, dat de Sass-Geschicht Sinn hett. Ik haap blot, dat wi Weeg finnt, dat beter an'n Mann to bringen.

Du hest sülvs schreven, dat di de Schrievwies ok mal to dull weer. Du kennst also ok dat Problem in'n Grundsatz. Wi (de Sass-Frünn) sünd ja ok nich so, dat wi all'ns lieks maakt, wat nich nipp un nau so in'n Sass steiht. Du hest en Grenz wo du seggst, dat is m to dull mit de Schrievwies, un wi hebbt een (wi langt an de Grenz blot al fröher an). Du hest dat denn ergänzt, seggst du, so dat tweemal de sülve Artikel dorstahn dei. Un dat is denn wedder dat Problem, dat keen sehn will: 'Keen sorgt dorför, dat beid Versionen aktuell blifft? Dor kunn mi noch keeneen en Anter op geven.

Du schriffst: Un’ denn: „De Spraak sülvs is Kultur un maakt dormit en groot Deel Weten ut.“ Wenn Du dat man jümmer seggt un’ docht haarst, weeirn Jii all ‚n gouden Innen wieter, glööv ick.. Ok dor will ik op antern. Dat hebb ik al jümmer dacht. Aver de eerste Punkt stimmt ok (Spraak as Medium). Dat is en Dualismus vun de Spraak, so as ok dat Licht to de sülve Tiet en Well un en Teilchen is. In dat ene Experiment süht dat ut as wenn dat en Well weer, in dat nächste kann dat Resultat blot denn stimmen, wenn dat Licht en Teilchen is. Mit de Spraak is dat lieks. In'n Gedicht liggt in de Spraak veel mehr as dat, wat an Informatschonen an'n Leser röverbracht warrt. In en Enzyklopädie is de Spraak wedder mehr Transportmedium.

Dat hett ouk recht gout gohn, bit hen tou dennen Dag, as door ‚n poor Radikool’n jemmer Ietelkeeit utleeb’n wull’n.

Intoleranz, Dickköppigkeeit un’ Scharpmookereei güng nu ennig lous. Dat weeir ‚n Mallöör! Door weeir mii kloor, dat waard de Anfang van ‚n Innen. Na, dat is nu aver temlich negativ. As ik hier vör nu een Johr anfungen bün, hebb ik dacht, hier sünd Lüüd ünnerwegens, de vun de Spraak wat verstaht. Ik hebb mi denn an de Schrievwies holen, de ik vörfunnen hebb, ik wull ja nix op'n Kopp stellen. Ik hebb mi fakener wunnert över dat wat ik sehn hebb, aver vun annere plattdüütsche Dialekten un de speziellen Ünnerscheed hebb ik noch nich so veel afweten (dor hebb ik nu eerst in't letzte Johr en beten mehr lehrt). Mit de Tiet hebb ik denn markt: veel vun de vörhannenen Artikels weren nich in frömd Platt, se weren in slecht Platt. Eerst denn keem dat mit'n Sass. Also keen ietlen, dickköppschen, intoleranten Scharpmaker, sünnern een, de dör de vörhannenen Problemen to en Lösung funnen hett (de Heiko em vörstellt harr). Ok de Afsatz vun dat Rutökeln un Afstempeln is meist en beten frech. As ik anfungen bün weren dor kene aktiven Bruker afsehn vun, ik glööv Sarcelles, Heiko un Gerold. Gerold harr twee Ännern maakt un wörr eerst richtig aktiv as ik al dorbi weer un Sarcelles weer grad woanners sparrt worrn un hett en beten Opsicht bruukt (mit en Grund för mien Start hier). Sietdem hebbt jümmer mal wedder Lüüd rinkeken, en poor sünd mit Sass-Ännern an ehre Artikels in Kontakt kamen. Ik will nich seggen, dat dat nich afschrecken kann, aver du stellst dat so dor, as wenn dat mit vulle Afsicht schehn is oder dat dat all'ns tominnst de logische Konsequenz ut Sass is. Wees en beten vörsichtiger mit solke Utdrück, dat gifft den Grundsatz vun Assume good faith. In'n nächsten Satz is dat wedder wat versöhnlicher, aver so Saken de stickt doch rut.

Jaun Glööv, de Heben haar Jau uutkeeiken, de nedderdüütsche Welt tou verbeetern Nee, an dat utkieken vun baven glööv ik nich. Schall ok nich de nedderdüütsche Welt verbetert warrn, de plattdüütsche Wikipedia reckt. Wenn wi de man verbetern köönt. Ik bün dorför dat de Prinzipien vun de Enzyklopädie nich den tweten Rang achter de Spraak/de Dialekten innehmt. Du to'n Bispeel stellst de Spraak wat höger as dat enzyklopädische.

Nu noch en Woort to Rügen, wo du dat ok ansprickst: De Artikel weer toeerst in Allerweltsplatt (keen Sass, aver ok keen regionale Schrievwies) schreven. Heiko hett denn en Fehler utbetert un dorbi de Scrievwies vun dat uneenheitliche Allerweltsplatt in eenheitlich Sass ännert. Eerst denn keem de Bruker ünner IP un hett dat in regional Platt ümännert (un sünst nix). Wenn dat denn jümmer wedder maakt warrt, denn mutt de Artikel sparrt warrn. Un dat hett ja hülpt: eerst na de Sparr hett de Bruker anfungen mal to diskuteren. Normal, wenn mien Ännern wedder trüchrullt warrt, harr ik glieks mal op de Diskuschoon schreven.

Naja, nu hebb ik al veel to veel Wöör maakt. Ok vun mi en frohe Wiehnacht an all de Schrievwies-Nonkonformisten ;-) --::Slomox:: >< 01:16, 24. Dez 2005 (UTC)

Hallo Slomox un Heiko!

De Artikels vun jo beiden hebb ik mit groot Interess lesen, wiel de glieken Gedanken mi ok al dör'n Kopp gahn sünd. Ik bün woll en echten Plattdüütschen, avers ik mööt doch togeven, dat ik bi dat Schrieven faken an Grenzen stööt un nich weet, wo ik daröver kaam. Dat Söken na en plattdüütsch Woort düürt faken to lang un faken mööt ik faststellen, dat dat vele Saken gifft, för de dat kien plattdüütsch Woort giift. Wenn ik en Book schriev, denn hölp ik mit mit Umschrieven ut de Klemm, aver in ene Enziklopädie is dat jo nich möglich. In mienen Verdreet hebb ik mi al bi de Wiktionary umkeken un ik mööt seggen, dat mi de Arbeit dar mehr Vergnögen maakt. Schall ik nu de plattdüütsche Wikipedia susen laten? Ne, dat will ik mi as enen, de sik jümmers för de plattdüütsche Spraak insett hett,nich naseggen laten. Ik maak wieter, viellicht nich mehr so fliedig as in de vergahnen Maanden, avers ik will jo hölpen, dat de Sass sik dörsetten deit bi de plattdüütschen Schrieverslüe.

Ik wünsch jo frohe Wiehnachen--84.129.224.132 15:33, 22. Dez 2005 (UTC)

Hallo, ik fin, dät wen wi Plätdütsch schrievn wilt, mudn wi ouns eynkels ok an eene historische Wiese van Schrievn holdn. Ik bin nu kin Linguist, men mischien kun man sik an de middelnedersaksische Sproake orientiern. Tominsen fin ik de Sasssche Schriefwiese wal `n bettien schlim vedütscht. Ok fin ik dät Argument, Löde, de minder good, of ok heelmoals kin Plät vestoat, mödt `t ok lesn ködn, kin schloant Argument, wail dan kun man ja net so good voart Dütsch schrievn. Eene plätdütsche Schriefwiese möd sik, so meen ik, an `t historische Vörbeild orientiern, en äs dät ebn kan, dan ok noa de efektieve Utsproake kiekn. Ik heb nu in Groafschupper Plät schrevn, ik hop, dät I de wat van makn könt.