Werner Stelly

Werner Stelly (* 25. Juni 1909 in Kumbarg; † 31. August 1997 in Hamborg) weer en düütschen Verwaltungsbeamten.

Stelly is 1909 in Kumbarg boren un in Horborg-Willemsborg opwussen. He hett Juristeree studeert un is 1936 na dat twete juristische Examen in’n apentlichen Deenst anfungen. He weer toeerst Referent bi de Rieksümsiedlungssellschop un denn Viezbaas in de Landweertschopsämter Kassel un Posen. Von 1943 bet 1945 weer he in’n Tweten Weltkrieg Soldaat. Von 1946 af an weer he in de Verwaltung von de Fre’e un Hansestadt Hamborg un is dor 1950 Baas von dat Rechtsafdeel bi dat Bezirksamt von’n Bezirk Horborg worrn. 1954 is he denn as Baas von dat Bezirksamt beropen worrn. Dat is he bet 1957 bleven.

1958 hett he sik in Wupperdaal to de Wahl to’n Böverstadtdirekter opstellen laten. As de Stadtraad an’n 18. Februar 1958 afstimmen dee, kunn he sik mit 27 gegen 13 Stimmen, bi veer Enthaltungen, gegen sien Vorgänger Hans Bremme dörsetten. An’n 4. Februar is he in sien Amt vereedigt worrn. In Stelly siene Amtstied hebbt se ünner annern dat Schauspeelhuus un de Kiesbergtunnel apenmaakt. An’n 15. März 1967 hebbt se em as Vörsitter von’n Finanzutschuss bi’n Düütschen Städtedag wählt. An’n 30. Juni 1967 is he ok as Viezmaat von’n Vörstand in’n Düütschen Spoorkassen- un Giroverband wählt worrn. An’n 30. Juni 1971 is he as Böverstadtdirekter von Wupperdaal trüggtreden. Sien Nachfolger weer Rolf Krumsiek. Von Wupperdaal is he denn wedder na Hamborg tagen. Dor is he an’n 31. August 1997 doodbleven.

Stelly weer ok as Schriever aktiv un hett ünner annern 1948 de Kortgeschichtensammlung Jetzt und hier rutbrocht un 1947 dat Höörspeel Auch eine kleine Stadt.

Ehren

1971 hett Stelly den Ehrenring von de Stadt Wupperdaal kregen.