Baas von dat Bezirksamt

De Baas von dat Bezirksamt is in de Fre’e un Hansestadt Hamborg de Persoon, de dat Leid över dat Bezirksamt hett, wat de Verwaltung von een von de söven Hambörger Bezirke is.

In de eersten Johren na’n Tweten Weltkrieg hett dit Amt ok Baas von’n Bezirk heten.

De Posten warrt normalerwies apentlich utschreven, de Kannedaat denn von de Bezirksversammlung wählt un denn von de hambörgsche Landsregeren, den Senaat, för söss Johr insett. Dat gellt so siet dat Bezirksverwaltungsgesett von’n 22. Mai 1978. Vörher is de Baas von dat Bezirksamt von’n Senaat in Invernehmen mit de Bezirksversammlung ernannt worrn.

Von wegen den Ümstand dat Hamborg gliektiedig Bundsland un Gemeen is, sünd de Bezirksämter keen egenstännige Verwaltungseenheiten. Se staht ünner de Bezirksverwaltung von de Finanzbehörd (Rechtsopsicht) un de Dezernate von dat Bezirksamt tosätzlich ünner de Fachbehörden von de Landsregeren (Fachopsicht). Fiskaalsch sünd se von de Huusholtsplaans afhängig, de dat Landsparlament, de Hambörger Börgerschop, beslütt.

In de Medien warrt de Baas von dat Bezirksamt fakener maal as „Bezirksbörgermeester“ betekent.