Waterleitung

Vun Wikipedia
Waterleitung

En Waterleitung oder Waterpiep is en Leitung, wat de Form van en holl Rohr hett un wo Water dör transporteert warrt. En Leitung besteiht ut inkelte Röhren, de miteneen verbunnen warrt.

Materialen[ännern | Bornkood ännern]

Dat gifft verschedene Stoffen, ut de Waterleitungen maakt warrt, as Kopper, Loot, Polyethen (PE), Polyvinylchlorid, Beton un annere.

Metall weer un is een wichtig Material för Waterpipen, sünners as dor noch keen Plastik för en Alternativ weer. De inkelt Röhren van de Leitung kann een dör Ringen oder Klemmen tohopenkoppeln oder tohopenlöten.

Waterpiepen ut Swoormetallen warrt hüdigendaags nich mehr in Hüüs anleggt. In ole Hüüs kann een liekers noch welke finnen. Blie is Gift för Minschen en Deerten, wat sik na un na in dat Water löst. Sünners wenn dat Water still steiht, künnt sik dor Bliepartikeln binnen sammeln. Deswegen mutt een alttieds dat Water en beten lopen laten, ehr een dorvun drinken wüll. So löpt dat Water mit dat Blie af un de Leitung warrt dörspölt. Wenn veel Loot binnen dat Water is, denn löppt een Gefohr, sick mit Blie to vergiften.

Blangen Loot is ok Kopper en Metall, wat för Waterpipen bruukt warrt. As Kunststoffen entwickelt weern, weern dor ok Waterleitungen van maakt. De inkelt Kunststoffröhren kann een miteeneen tohopenliemen oder versmölten oder mit sünnere Klemmen verbinnen.

Druck[ännern | Bornkood ännern]

Water weer fröher faken un ok vandaag noch af un an in en Watertoorn spiekert. So warrt en Watervörraat anleggt un de Druck in de Leitungen – de van de Toorn afloopt – blifft jümmer gliek. Dor is en mathemaatsch Proportschoon tüschen de Höögt vun den Toorn un den Druck vun’t Water. All teihn Meters stiggt de Druck üm ruchweg 10 N/cm² (oder 100 kPa). Ümdat de Lüüd nich alltieds en konstante Druck hebbt, sünd Watertoorns roor worrn. Vandaag warrt de Druck mit Pumpen maakt un kann anpasst warren an den Verbruuk van dat Water.