Walter Ballof

Walter Ballof (* 10. September 1893 in Tondern; † 7. Oktober 1957 in Bremerhoben) weer en Bremerhobener Politiker von de SPD.

Ballof is 1893 in Tondern boren. He weer siet de Johren 1920 Schoolmeester an en Hannelsschool in Bremerhoben. In de Tied von’n Natschonalsozialismus is he as Schoolmeester rutsmeten worrn un weer denn Koopmann. Na’n Tweten Weltkrieg weer he 1946 toeerst Börgermeester in Wersermünn. Von’n 13. Februar 1947 bet 1951 weer he Liddmaat von de Breemsche Börgerschop. Von’n 13. Februar 1947 bet to’n 24. Oktober 1947 hett he tohoop mit Gerhard von Heukelum as Vertreder von Bremerhoben to’n Senaat höört. Von 1948 bet 1949 weer he ehrenamtlichen Stadtraad un Dezernent för Scholen un Jugendpleeg in Bremerhoben. Kunflikte twüschen em un den kunservativen Stadtschoolraad Walter Zimmermann schöölt in’n Mai 1949 dor to föhrt hebben, dat Ballof von de amerikaansche Militärregerung as Stadtraad afsett worrn is.