Börgerschop vun Bremen (Landdag)

De Börgerschup vun Bremen (Landdag) ist dat Parlament vun dat Bundsland Bremen. De Börgerschop is in dat Huus vun de Börgerschop an'n Marktplatz to Bremen tohuse. Dor höört 68 Liddmaten ut de Stadt Bremen un 15 ut de Stadt Bremerhoben to.

Wahl

De Börgerschup vun Bremen warrt all veer Jahren in unmiddelbare, free, glieke un geheme Wahlen wählt. Dorbi gellt de Grundsätz vun de Verhältniswahl. Dat Land is updeelt in de Wahlbezirken Bremen un Bremerhaben. In beide Bezirken gellt je för sik de 5% Utnahm: Bloß Parteien, de öber 5 % vun de Wählerstimmen kriegt, dröövt in de Börgerschop intrecken.

Bremen

In Bremen weert 68 vun de 83 Afordenten wählt. Bit 2003 geev dat in de Börgerschop 100 Afordenten, man denn hefft sik de Bremers seggt, de ganze Saak is to düür, un nu gifft dat bloß noch 83. De Börgerschup ehr Liddmaten ut de Stadt Bremen höört to glieke Tiet to de Stadtbörgerschop vun Bremen hento.

Bremerhaben

De annern 15 Liddmaten vun de Börgerschop weert in Bremerhaben wählt. För dat Kommunale Parlament in düsse Stadt gifft dat noch mal een anner Wahl. Dor weert denn 48 Liddmaten för de Stadtverordentenversammeln wählt.

Bisitters in de Bremer Stadtdelen

In de Bremer Stadtdelen gifft dat noch mal sowat as lüttje Börgerschoppen, dat sünd de Bisitterversammeln (Stadtteilbeiräte). De dröövt een beten wat in de Politik vun de Stadtdelen muddeln, man richtig veel to seggen hefft se nich. Vun 1991 af an weert de Liddmaten vun de Bisitterversammeln bi de Wahlen to de Börgerschop extra wählt. Vördem weer dat so, dat de eenfach updeelt wurrn sünd, just nah dat, wat bi de Wahl to de Börgerschup in den Stadtdeel rutkamen is.

Wer draff wählen?

Jeden Börger vun Bremen draff sik wählen laten un ok wählen, wenn he man tominnsten 18 Jahr oolt is, siet tominnst dree Monaten in Bremen wohnen deit un een düütschen Staatsbörger is.

Wat bi de Wahlen to de Bremer Börgerschop rutkamen is

1. Wahlperiode (1946–1947)
2. Wahlperiode (1947–1951)
3. Wahlperiode (1951–1955)
4. Wahlperiode (1955–1959)
5. Wahlperiode (1959–1963)
6. Wahlperiode (1963–1967)
7. Wahlperiode (1967–1971)
8. Wahlperiode (1971–1975)
9. Wahlperiode (1975–1979)
10. Wahlperiode (1979–1983)
11. Wahlperiode (1983–1987)
12. Wahlperiode (1987–1991)
13. Wahlperiode (1991–1995)
14. Wahlperiode (1995–1999)
15. Wahlperiode (1999–2003)
16. Wahlperiode (2003–2007)
17. Wahlperiode (2007–2011)
18. Wahlperiode (2011-2015)
19. Wahlperiode (2015-2019)
20. Wahlperiode (2019-2023)
21. Wahlperiode (2023-)

De Liddmaten vun de hüdige Börgerschop staht in den Artikel ünner den Lenk to de 17. Wahlperiode.

Plattdüütsch in de Börgerschop

Normolerwiese is de Sprake vun de Debatten in de Bremer Börgerschop natüürlich Hoochdüütsch. Man an'n 9. Mai 2008 hett dat en plattdüütschen Andrag vun de CDU-Fraktschoon geven: „An Plattdüütsch fasthollen un Plattdüütsch starker maken“. Över düssen Andrag is in de 25. Sitten an'n 2. Juli 2008 en Debatte in de Börgerschop föhrt wurrn (Börgerschopsdebatte över den Andrag vun de CDU-Fraktschoon) Dor hett dat Reden vun al veer Fraaktschonen to geven. Bloß de SPD hett hoochdüütsch snackt. De annern Fraktschonen hefft up Platt reedt (Bi Bündnis 90/De Grönen Platt un Hooch). Redners weern Frank Imhoff vun de CDU, Emin Sükrü Senkal vun de SPD, Klaus-Rainer Rupp vun de Linke, Dr. Magnus Buhlert vun de FDP un Frank Werner Willmann vun de Grönen. Börgermeester Jens Böhrnsen hett up Hoochdüütsch dat Slusswoort spraken. De Andrag vun de CDU is denn vun dat Hoge Huus eenstimmig wietergeven wurrn an de Deputatschoon för Kultur.

Weblenken

Henwies