Börgerschop vun Bremen (Huus)

Dat Huus vun de Börgerschup

De Börgerschup vun Bremen (ok: Huus vun de Börgerschup) is dat Boowark an den Marktplatz to Bremen, wo sik de Liddmaten vun de Bremer Börgerschop in drepen doot.

Vör 1933

Bit 1933 harr de Börgerschop sik in de Börse an den Marktplatz drapen. Dor geev dat eenen groden Ruum, dat weer de Saal vun de Börgerschop. Düsse Saal is 1864 in de nee Böörs inricht wurrn. He weer ganz in den neegootschen Stil utstaffeert.

In de Nazitiet

In de Nazitiet geev dat keen Versammeln vun de Börgerschup, dat Stadtbestüür lä ganz in de Hannen vun den Rieksstattholler, den Gauleiter un den Börgermeester mit den Senaat.

Nah den 2.Weltkrieg

Vun 1945 af an keem de Börgerschop in den Festsaal vun dat Nee Raathuus tohopen. De Börse mit den Saal vun de Börgerschop is 1943 bi eenen Bombenangreep in'n Dutt gahn.

Vun 1947 af an wurr in de Stadt öber een nee Boowark för de Börgerschup snackt. Toeerst güng dat üm dat Theater up'n Wall. Dat lä ok in'n Dutt un scholl wedder upboot weeren as Huus vun de Börgerschop. Man denn hett de Kammer vun den Hannel 1950 dat Grundstück vun de tweie Börse to'n Koop anboden. In'n Oktober 1951 wurr denn een Wettstriet utschreben för Ideen, wie dat Huus vun de Börgerschop tokümstig utsehn scholl. Man ok öber dat Grundstück vun dat ole Theater an'n Wall is fudder nahdacht wurrn.

Twee Wettstrieden un een Winner

Bi den Wettstriet sünd denn 125 Vörslääg ingahn. De Fraktionen vun de CDU un de SPD wollen annernvorsik lever up dat Grundstück an'n Wall boon, man de FDP un de Kammer vun den Hannel spreken sik för dat Grundstück an'n Marktplatz ut. 1956 güng dat eerst mal los un up een Deel vun dat Grundstück vun de ole Börse an'n Markt is nah Plaans vun den Architekten Bernhard Wessel boot wurrn. Wessel hett ok dat Raathuus to Emden plaant.

In'n November 1956 is denn beslaten wurrn, dat Huus vun de Börgerschop an'n Markt to boon un 1957 hett de Kammer vun den Hannel dat Land an Bremen verköfft. 1958 geev dat noch mal eenen Wettstriet för den Boo. Düt mal keemen 71 Vörslääg tohopen. Dat Priesgericht hett sik denn för de beiden Vörslääg vun Wassili Luckhardt un vun Gerhard Müller-Menckens utspraken. Man de beiden mössen dat noch mal öberarbeiden. Liekers sünd de Vörslääg denn nich annahmen wurrn un de Architekten mössen noch mal ran. Amenn wurr 1961 de Vörslag vun Luckardt annahmen. Man dor weer midderwielen noch mal bannig an arbeit wurrn un besunners de Siet nah den Marktplatz hen seehg nu ganz anners ut, as toeerst. An düsse Siet sünd ok 15 Reliefs ut vergullt Aluminium vun Bernhard Heiliger 1965 anbröcht wurrn.