Walkmöhl Ohrens
Walkmöhl Ohrens is en Watermöhl an’n Depenbeek bi Ohrens. Se is as Walkmöhl bruukt worrn, üm Stoff hertostellen. Ok Wittgarvers hebbt jemehr Fellen dor walkt.
De Möhl liggt op de Stoder Geest en Stück in’n Süden von dat Dörp Ohrens, is nich wied af von de Steed, an de de Depenbeek in de Au münnt, un liggt in dat Naturschuulrebeed Audaal un Blangendaals.
Historie
[ännern | Bornkood ännern]De Möhl kummt an’n 17. Juli 1664 toeerst in en Verdrag vör, in den Pierre de Bidal as Herr över dat Amt Harsfeld mit de Weetfro von Benneken Hagedorn un dat Wandmakeramt in Stood afmaakt, dat de Möhl för söven Johr verpacht warrt. De Familie Hagedorn hett de Möhl denn in Arventins kregen. De Walkmöhl is bet to’n 25. Mai 1907 lopen, as en Hoogwater för so swore Schadens sorgt hett, dat sik de Reparatur nich mehr lohnt hett.
1930/1931 is se von Ludwig Schmidt ut Hamborg för de Jugendarbeid von de Paddsökers (Grupp Geusen) ümboot worrn. 1934 hett de Hitlerjugend dat Gebüüd övernahmen. Nan’n Tweten Weltkrieg keem Schmidt 1949 wedder un hett de Möhl bet 1950 wedder herricht. De Möhl is 1964 von de Familie Hagedorn an’n Landkreis Stood verköfft worrn. An’n 20. Juni 1986 is de Dackstohl von de Möhl utbrennt. Vondaag is se en Jugendinrichtung von’n Landkreis un warrt jümmer noch vör allen von Paddsökers bruukt.
De Hoff, de to de Möhl tohöört hett, is jümmer noch in Besitt von de Familie Hagedorn. Dor warrt nu Fischtucht (Kois un Fisch för Goorndieken) bedreven.
Koordinaten:53° 28′ N, 9° 28′ O