Vörlaag:Hööftsiet/utwählt Artikel dissen Maand/2013-03
As dat Röömsche Riek warrt vundaag dat histoorsche Rebeet vun de ollen Römers in de Tiet twüschen dat 8. Johrhunnert v. Chr. un dat 7. Johrhunnert n. Chr. betekent, dat vun de antiken Stadt Rom ut regeert weer. De Historie vun dat Riek lett sik in veer Afsneden indeelen: 753 v. Chr. güng dat mit de Königstiet los, dorna keem 509 v. Chr. de Röömsche Republiek, de 27 v. Chr. vun de Kaisertiet aflööst weer. Toletzt keem de Late Antike, in de ok de groten Völkerwannern fallt. Vun Rom ut hett sik dat Römmsche Riek toeerst in Italien utbreedt un denn wieter ründ um de Middellannsche See. De gröttste Utdehnen harr dat Röömsche Riek in’t 3. Johrhunnert n. Chr. un ümfaat dormols de hele afrikaansche Noordküst, Middeleuropa bit na Süüddüütschland un wiete Deelen vun Britannien, dat Iberische Halfeiland, Grekenland un grote Rebeden üm’t Swarte Meer.