United Tasmania Group

Logo vun de Partei

De United Tasmania Group (UTG) weer en Partei in Tasmanien. De UTG warrt faken as de allereerste Gröne Partei op de Welt ansehn.

In de fröhen Johren 1970 schullen dree Staudämm an’n Pedder-See in’n Süüdwesten von Tasmanien boot warrn. Gegen dissen Angreep op de Natur harr sik in’n April 1971 dat Lake Pedder Action Committee billt. Bi en Drepen von disse Grupp is denn an’n 23. März 1972 in Hobart de UTG grünnt worrn. De eerste Präsident weer Richard Jones. Dat güng vör allen dor üm, dat Kannedaten för de tasmaanschen Wahlen in’n April 1972 opstellt warrn schullen.

Bi disse Wahlen hett de UTG denn 3,9 % kregen un is dormit so bi 200 Stemmen an en Mandat vörbi. Bob Brown weer 1975 UTG-Kannedaat för den austraalschen Senaat. Bi de Wahlen 1976 hebbt se 2,2 % kregen.

Na de Wahlen 1976 hebbt denn annere gröne Gruppen so as de Wilderness Society un de Austraalschen Demokraten mehr Wicht wunnen. De UTG weer von’n 1.Dezember 1979 af an nich mehr aktiv. De Parteilüüd sünd later to’n groten Deel Maten von de 1992 grünnten Tasmaanschen Grönen worrn, de vondaag Deel von de Austraalschen Grönen sünd.

Ideen

De UTG wull en Partei wesen, de ut regionale Gruppen tohoopsett is un nich zentraal lenkt warrt. Se wull sik insetten för de Ümwelt, wull de Geschicht un Kultur bewohren un wull, dat dat weertschopliche un soziale Leven in Tasmanien tohoop un gemeensam von de Minschen plaant warrt.

In’t Programm stünn ok, dat wetenschopliche Instituten grünnt warrn schullen, de de Ressourcen op Land un op See ünnersöken schullen, dat ökoloogsch bedreven Farmen grünnt warrn schullen, dat de traditionelle Fischeree bewohrt warrn schull un tosehn warrn schull, dat de Fischeree so bedreven warrt, dat de Fischfang duurhaft stabil blifft. Nationalparks schullen utboot warrn, Land in olen Naturtostand un histoorsche Hüüs schullen bewohrt warrn. De Industrie schull so utleggt wesen, dat se sik mit de Natur vergahn kann.