Tommy Dorsey

Vun Wikipedia
Tommy Dorsey, ca. Oktober 1947.
Fotografie vun William P. Gottlieb.

Tommy Dorsey (egentlich Thomas Francis Dorsey; * 19. November 1905 in Shenandoah, Pennsylvania; † 26. November 1956 in Greenwich, Connecticut) weer en US-amerikaansch Jazzmusiker (Basuunist un Trompeter).

Tosommen mit sien Bröer Jimmy Dorsey grünn Tommy all in de 1920er Johren in Shenandoah de Dorsey's Novelty Six. Se hebbt ok beid bi de California Ramblers un in de darut afleit Studioband The Little Ramblers speelt. In New York hebbt sück de Weeg vun de beid Bröers tonächst trennt. Tommy Dorsey speel ünner annern 1927 bit 1928 in dat Orchester vun Paul Whiteman. 1934 bit 1935 hett he denn tosommen mit sien Bröer de bannig spoodriek Dorsey Brother Band leit, in de ünner annern later sülvst spoodriek Bandleader as Glenn Miller un Bob Crosby as Musiker tätig weern. 1935 grünn Tommy Dorsey sien eegen Big Band, de to en vun de an’ meesten ansehn un spoodriekst Orchester vun de Big Band-Ära wurr. Stilistisch tüschen Danzmusik un Jazz ansiedelt, hebbt bi Dorsey ünner annern so bekannt Jazzmusiker ut de Epoche as Gene Krupa, Buddy Rich, Charlie Shavers, Bunny Berigan un Buddy De Franco speelt. As Arrangeure weern ünner annern Sy Oliver un Paul Weston för Dorsey tätig, as Singers Jack Leonard, Frank Sinatra, Connie Haines un Jo Stafford. Een vun sien gröttsten Hits weer I’ll Never Smile Again mit Sinatra 1940. Sien Arrangeur Matt Dennis leefer den Hit „Everything Happens to Me“.

Tommy Dorsey, de sien Instrument virtuos beherrsch, harr de Binaam The Sentimental Gentleman of Swing. De Erkennungsmelodie (signature tune) vun sien Orchester weer I'm Getting Sentimental Over You.

1953 sloot sück Jimmy Dorsey weer an dat Orchester vun sien Bröer an, dat in de Folgetied ünner de Naam The Fabulous Dorsey Brothers and their Orchestra spelen de un in dat vör allen de Trompeter Charlie Shavers as ok de Slagtüüchspeler Louis Bellson en herutragend Rull speelt hemm. Stilistisch orienteer sück dat Orchester nah den Intritt vun Jimmy Dorsey tonehmend an Count Basie un beleev Midden vun de 1950er Johren en enorme Resonanz, de sück ok ut de gemeensam Feernsehshow un de dortig Tosommenarbeit mit Elvis Presley ergeev.

In’ November 1956 is Tommy Dorsey in’ Slaap nah tovöl Alkohol un de Innahm vun Slaaptabletten to glieker Tiet stickt.

Ehrungen[ännern | Bornkood ännern]

Tommy Dorsey is in de American Jazz Hall of Fame upnommen wurrn un 1981 wurr he in de Big Band and Jazz Hall of Fame upnommen.

Weblenken[ännern | Bornkood ännern]