Todos-Santos-Formatschoon
De Todos-Santos-Formatschoon is en geoloogsche Formatschoon, de in’n mexikaanschen Bundsstaat Chiapas, de Bundsstaten ümto un in Guatemala un Honduras vörkummt. De Schicht is twüschen 250 un 1350 Meter dick.
De Naam kummt von’n Oort Todos Santos Cuchumatán in Guatemala. Defineert worrn is de Formatschoon 1899 von Karl Sapper. 1942 is se noch intensiver von Friedrich Karl Gustav Müllerried ünnersöcht worrn.
De Formatschoon hett sik in de Tied von 170 Milljonen Johren vör uns Tied af an billt (in de Jura bet in de Kried). Ünner de Todos-Santos-Formatschoon liggt de La-Silla-Formatschoon. Dor över liggt de San-Ricardo-Formatschoon (bi Cintalapa de Figueroa) oder de Mogoñe-Formatschoon (Isthmus von Tehuantepec).
De Formatschoon warrt wieder ünnerdeelt in en öllere El-Diamante-Ünnerformatschoon un en jüngere Jericó-Ünnerformatschoon.
Utlöser för de tektoonschen Vörgäng, in de sik de Formatschoon billt hett, weer, dat sik in’n Noorden en Graven billt hett, ut den later de Golf von Mexiko worrn is.
Dat Rebeed weer in de Tied von de El-Diamante-Ünnerformatschoon See un hett en Intraarc-Becken billt, in dat sik See-Sedimenten ut Sandsteen mit vulkaansche Aflagerungen afwesselt hebbt. In de Jericó-Ünnerformatschoon weer dat en Gravenbecken.