Tjalling Charles Koopmans
Tjalling Charles Koopmans (* 28. August 1910 in 's-Graveland, hüüd to Wijdemeren; † 26. Februar 1985 in New Haven, Connecticut) weer en US-amerikaansch Ökonom un Physiker vun nedderlannsch Afstammen. 1975 kreeg he tosommen mit Leonid Witaljewitsch Kantorowitsch den Nobelpries för Wertschapswetenschapen för hör Bidrag to de Theorie vun de optimal Ressourcen-Verwennen.
Koopmans weer de Söhn vun en Schoolmeester-Ehepaar un gung in Hilversum to de School. Af 1927 studeer he Mathematik un Physik an de Universität Utrecht, mit den Afsluss 1932. Wiels dat Studium fung he an, sück för Ökonomie to interesseeren un hett denn bi Jan Tinbergen in Amsterdam un Ragnar Frisch in Oslo studeert. 1936 wurr he an de Universität Leiden mit de Arbeit Lineare Regressionsanalyse in der Ökonomie promoveert. Af 1936 weer he eenig Johren Kolleeg vun Jan Tinbergen an de Nedderlannsch Wertschapsschool in Rotterdam un dornah ok weer mit Tinbergen bi den Völkerbund in Genf, wo he an de Modelleeren vun Wertschapszyklen arbeiten dee. Nah de Besetten vun Frankriek un den Nedderlannen dör de Nationalsozialisten gung Koopmans in de USA in't Exil. He hett in Princeton (1940/41) forscht, weer denn bi de Mutual Life Insurance Company in Philadelphia un bi de britisch Hannelsschipp-Mission in Washington D. C. tätig, wo he an de Verbeetern vun de Schippfohrtsrouten tüschen USA und England arbeiten dee. Sien Ergevnisse hett he 1944 in den Upsatz (Exchange ratio between cargos on different routes, toeerst verapenlicht 1970) to Papier brocht, de de Aktivitätsanalyse in de Operations Research begrünnen dee. Sien Arbeiten ut disse Tiet hebbt hüm neben Kantorowitsch un George Dantzig to een vun de Pioniere vun de Lineare Programmeeren maakt. 1944 is he de Cowles Commission for Research in Economics an de Universität Chicago bitreden un gung 1955 gung an de Yale University, wo he Alfred Cowles Professor of Economics wurr. 1980 is he in den Ruhestand gahn.
Koopmans weer siet 1936 mit de Wertschapswetenschaplerin Truus Wanningen verheiraadt, mit de he twee Döchter un een Söhn harr. 1946 nehm he de US-Staatsbürgerschap an. He weer Liddmaat vun de National Academy of Sciences un de American Academy of Arts and Sciences. Buterdem weer he Präsident vun de American Economics Association un de Econometric Society.
Weblenken
[ännern | Bornkood ännern]- Tjalling Charles Koopmans up de Siet vun den Nobelpries (engelsch)
- Tjalling Charles Koopmans In: MacTutor History of Mathematics archive (engelsch)
- DNB-Katalog
Literatur
[ännern | Bornkood ännern]- T. C. Koopmans: Activity Analysis of Production and Allocation. In: Cowles Commission Monograph. Nr. 13, New York, London 1951.
- Koopmans, A. F. Bausch Selected topics in economics involving mathematical reasoning, 1959
- Koopmans Three essays on the state of economic science, McGraw Hill 1957
- Koopmans (Herausgeber) Statistical inference in dynamic economic models (Cowles Commission Research Staff and Guests), Wiley 1950
- Koopmans, Wood (Herausgeber) Studies in econometric method (Cowles Commission Research Staff), Wiley 1953
- Koopmans Tanker freight rates and tankship building; an analysis of cyclical fluctuations, Haarlem, London 1939
- M. Beckmann, C. F. Christ, M. Nerlove (Herausgeber): Scientific papers of Tjalling C. Koopmans, Springer Verlag 1970