Tim Ole Naske

Tim Ole „TOle“ Naske (* 26. Prillendag 1996 in Hambuorg) is enen düütsken Roderer. He wüör de düütske Mester in’n Ener in de Jaore 2017 und 2018.

Liäwen[ännern | Bornkood ännern]

Nasken Tim Ole fong dat Rodern an äs he 10 Jaore olt was. Sinen daomaoligen Spuortlärer Webers Christiane häw för de Roder-AG an sine Grundschool wiäwet. Naske un Syrings Philipp-André wunnen in’n Dubbeltweer bi de Junioren-Wiältmesterschup 2013 dän Juniorenwiältmester-Tiddel. In dat Jaor danao is he in’n Ener antruoten. Bi de Junioren-Wiältmesterschup 2014 wun he met üöwer 20 Sekunnen Vüörsprung. Bi de Olimpisken Jöögtspiële wun he auk. 2015 wunnen Riemekastens Stephan un Nakse dän Mestertiddel in’n Dubbeltweer bi de U23-Wiältmesterschuppen. Een Jaor läter wun he dän U23-Wiältmestertiddel in Rotterdam in’n Ener.

Dat Jaor 2017 fong he äs Winner van dat Düütske Mesterschupsrodern in’n Ener an.^[1] Bi de Europamesterschuppen raakde he dat A-Finale un wüör Füwte. Bi de Wiältmesterschuppen in dat sölwige Jaor raakde he wier dat A-Finale. Dütmaol wüör he Seste. 2018 wun he wier dat Düütske Mesterschupsrodern in’n Ener un lait Krügers Stephan un Zeidlers Oliver ächter sik.^[1] Bi dän twedden un diärden Wiältcuplaup trat he in Ener an un wüör Twedde un Seste. De Düütske Rodervöband (DRV) melde em aower nich för de Wiältmesterschuppen, dao häbt se Zeidlers Oliver in’n Ener mellet.^[2] Bi dat Düütske Mesterschupsrodern 2019 trok he sik nao dat Veerdelfinale trüg. He was seer. Dän Rest van’t Jaor roderden Krügers Stephan un he in’n Dubbeltweer. Bi de Internasjaunalen Wedau-Regatta sätteden se sik giëgen Pionteks Timo un Hartigs Lars düör. Se wollen auk för Düütskland antriäten. Bi de Europamesterschuppen 2019 häbt Krüger un Nakse dat A-Finale nich raket. Äs Winner van’t B-Finale sint se Siëmte wuorn. In’n twedden un diärden Weltcuplaup sint se Diärde un Füwte wuorn. Bi de Wiältmesterschuppen rakden se wier nich dat A-Finale. Äs Tainte kwalifiserden se dän düütsken Manslüdubbeltweer för de Olympisken Spiële 2020. 2020 sat he in’n Dubbelveerer. Wiägen de Covid-19-Pandemi sint viële Regatten uutfallen. De ensigste internasjaunale Regatta wüörn de Europamesterschuppen. De Manschup Gruhnen Hans, Schulzen Karl, Appels Max un Nasken Tim Ole is de seste van elw Metmakers wuorn.

Naske is 1,83 m graut und wög ne 87 kg. He is Let van de RG Hansa Hamburg und studeert Rechtswiëtenschup an de Haugschole Hambuorg.