Tennis

Tennis is en Ballspeel dat to de Klass vun de Torüchslagspelen höört. Disse Sportoort kann mit twee Spelers (as Enkel) oder mit veer Spelers (as Dubbel) utöövt warrn. En sünnere Oort vun’t Dubbel is dat Mixed, wobi en Mannschop ut een Fro un een Mann besteiht.

De Spelers staht sik op en dör en Nett in de Mitt in twee Hälften deelt Speelfeld un versöökt, den Tennisball mit Help vun den Tennissläger so in dat gegnerische Feld to slahn, dat de Gegner nich in de Laag is, den Ball op regelgerechte Oort un Wies wedder torüchtospelen.

Tennis gifft dat in’n Bredensport as ok in’n Profisport un warrt ok to de Olympschen Sportoorden rekent, de bi de Sommerspelen utdragen warrt.

Historie

De Grundlaag för’t Tennisspeel kummt ut Frankriek, woneem de Vörlöper, Jeu de Paume („Speel mit de flachen Hand“) in Kloosterhööv, later denn in Ballspeelhüüs op en rechteckig Feld speelt weer. De Speler hebbt de Angaav vun de Siet ut maakt. Dorto slögen se den Ball över’t Nett gegen een Wand, de an’t Feld lang lööp. De Tokiekers seten an de Wand gegenöver. Dat Feld weer dör Lienen in veer fööfteihn Toll (üm un bi 40 cm) brede, parallel lopen Striepen to beide Nettsieten indeelt.

De engelsche Major Walter Clopton Wingfield hett sik 1874 sien Oort vun Tennis patenteeren laten, dat he sülvst „Sphairistike“ nöömt harr. Dat weer dat greeksche Woort för „Ballspelen“. He hett ok ne’e Regeln opstellt. Dat Tennis, dat bit vundaag begäng is, is later mit nee Regeln bi de de eersten Meesterschoppen in Wimbledon (London) in’n Juli 1877 tostannen kamen.

Anfang vun de 1930er Johren is dat Profi-Tennis inföhrt worrn mit de Naklapp, dat nich mehr all Tennispeler an de groden Turneren deelnehmen dröffen. Dat hett sik eerst 1968 ännert, as de apenen Turneren opkamen sünd un de so nöömte open Era anfüng. To de Tiet sünd ok de vundaag hoochdoteerte Turneren entstahn as de US Open oder de French Open.

De Naam Tennis geiht op en Begreep tenes oder tenetz ut dat Middelengelsche torüch, de en annert Ballspeel betekent het. De Oorsprung dorvun lett sik wedder op den Imperativ Plural vun’t franzöösche tenir („hollen“) torüchföhren. De Utroop „Tenez!“ in’n Sinn vun „Annehmen! Holl (den Ball)“ vun den opslahn Speler weer mööglicherwies as Warnen för den Mitspeler dacht.

Speelregeln

Teel vun’t Speel

Dat Teel bi en Tennisspeel is, de nödige Tall vun Sätz to winnen. Dorto mutt de Ball so in dat Feld vun’n Gegner speelt warrn, dat de em nich mehr kriegen oder nich mehr in de annere Feldhälft torüchslahn kann oder de Ball bi den Versöök vun’t Torüchspeel in’t Nett hanngen blifft. De Ball dröff vörher hööchstens eenmol op’n Bodden opkamen un mutt mit den Tennissläger so torüchslahn warrn, dat he wedder binnen dat Gegnerfeld opkummt. De Butenlienen vun’t Feld warrt dorbi mit to dat Feld rekent.

De Ballwessel warrt mit den Opslag anfungen, de vun een Speler vun de Grundlien ut in en sünneret, lütteret Feld speelt warrn mutt, dat as Opslagfeld betekent warrt. Dorbi dröff de Grundlien nich överpeddt warrn. Wenn de Opslag fehlerhaft speelt worrn is, hett de Opsläger noch en tweeten Versöök. Wenn ok de nich richtig utföhrt worrn is, warrt dorto Dubbelfehler seggt un de Punkt geiht an den annern Speler. Geiht een regelgerechten Opslag gegen de Nettkant vördem he in den Opslagfeld opdrapt, warrt de Opslag eenfach wedderholt, ahn dat dat as Fehler weert warrt.

Tellwies

Dat Tennisspeel is in sik struktureert, wobi de enkelten Delen faken ok mit de mit engelsche Begrepen betekent warrt: Dat vullstännige Speel warrt Match nöömt, dat in Sätz (Set) ünnerdeelt is, de wedder ut enkelte Spelen oder Games besteiht. De Tall vun de Spelen un vun de Sätz hangt vun’n Speelverloop af.

En Satz is wunnen, wenn en Speler söss oder söven Spelen Wunnen hett: Söss Spelen reckt, wenn de Gegner hööchstens veer Spelen wunnen hett. Wenn dat 6:5 steiht, de Gegner also al fief Spelen wunnen hett, mutt wieter speelt warrn. Steiht dat na dat nächste Speel 7:5 is de Satz wunnen. Wenn dat aver 6:6 steiht, warrt de Satz dör en sünnere Speeloort, den Tie-Break, beennt. De Speler, de den Tie-Break för sik entscheden kann, winnt den Satz mit 7:6.

En Sünnerregel dorvun gifft dat aver bi de Grand-Slam-Turneren (mit Utnahm, vun de US Open) un bi’n Davis Cup. Dor gifft dat in den bedüden Satz (dat is de föffte bi de Mannslüüd oder de drüdde bi de Fronslüüd) keen Tie-Break, man dor mutt so lang wieterspeelt warrn, bit een Speler twee Spelen Vörsprung hett. Disse Rgel hett fröher in jeden Satz gellt, as de Tie-Break noch nich in de Regeln stünn.

In en normaal Speel hett een vun de beiden Gegners Dat Opslagrecht. Tellt warrt in en Speel in die nafolgen Reeg: 0, 15, 30, 40. Wunnen hett de Speler, de mit 40 Punkten noch en wieteren Punkt maken deit. Man, dat reckt blots denn, wenn twee Punkten Ünnerscheed sünd. Steiht dat nämlich 40:40, wat ok as Gliekstand (Deuce) betekent warrt, reckt de nächste Punkt noch nich. De Speler, de den nächsten Punkt maakt, hett denn eerstmol blots Vördeel (Advantage). Winnt he noch een Punkt, hett he dat Speel wunnen, wenn nich, is wedder Gliekstand. Normalerwies warrt bi den Speelstand 40:40 foorts Gliekstand anseggt. En Utnahm dorvun gifft dat bi de French Open, woneem de Stand as „40 beide“ („quarante-à“) anseggt warrt un eerst bi’n nächsten Gliekstand égalité anseggt warrt.

De Speler, de dat Opslagrecht hett, is in’n Vördeel gegenöver den torüchslahn Speler, vun wegen dat he mit en wuchtigen Opslag veel Druck op den Gegen utöven kann. In’n professionellen Tennissport is dat dorüm normal, dat dat Opslagspeel wunnen warrt. Man seggt ok, dat de Speler sien Opslag dörbröcht hett. Wenn aver de torüchslahn Speler winnen deit, denn seggt man, dat dat Opslagspeel dörbroken worrn is, un man snakct vun en Break. Vun wegen den Vördeel bi’n Opslag kann en Break also al den Utgang vun’n helen Satz bestimmen. Wenn en Speler in en Speel mit den nächsten Ballwessel en Break maken kann, warrt dorto ok Breakball seggt.

De Tall vun de Sätz hangt vun de Turneerregeln af. Tomeist warrt in’n Tennis över twee Winnsätz speelt. Dat heet, dat een Speler, de twee Sätz wunnen hett ok dat hele Match winnt. Bi gröttere Turneren oder in’t Endspeel vun en Turneer warrt bi de Mannslüüd faken ok dree Winnsätz utspeelt. Dat heet, dat bi gliek starke Gegners bit to fief Sätz speelt warrn mööt. Bi Senioren kann an de Steed vun den Utslag geven drüdden Satz ok en Tie-Break speelt warrn. In eenige Verbännen vun’n DTB (t. B. in Baden-Württemberg) warrt opstunns ok in Verbandsspelen vun de Aktiven keen drüdden Satz mehr speelt. An de Steed warrt en Tie-Break op 10 Punkten speelt, de as Match-Tiebreak betekent warrt.

En Ballwessel, de to’n Winnen vun en helen Satz föhren kann, warrt ok Satzball nöömt, wenn dat üm den entscheeden letzten Satz geiht, seggt man dorto Matchball.

Historie vun de Tellwies

To de Tellwies gifft dat twee verscheden Ansichten, woans sik dat entwickelt hett. An Fakensten warrt de Vermoden angeven, dat de Tellwies op Speelwetten un Geldinsätz in’t 14. Johrhunnert in Frankriek torüch geiht. So hett man to’n Bispeel en gros denier sett, de wedder en Weert vun 15 denier harr. In een Satz, de dormols faken ut veer Spelen bestahn hett, sünd also veer mol 15 deniers sett worrn: 15 – 30 – 45 – 60. In’t 16. Johrhunnert is ut de 45 wohrschienlich ut Mack un vun wegen de körtere Utspraak 40 worrn.

Dat olle franzöösche Sol (later Sou) hett as Münteenheit deent. De Sol weer in’t middelöller de Reekeneenheit för twölf Pennen (ooltfranzöösch: dernier). Disse Eenheit weer 1266 to’n eersten mol in Form vun en Sülvermünt prägt, den gros dernier tournois („grode Penn vun Tours“). Dat Gelstück is in’t 14. Johrhunnert mehrmols naprägt worrn, de Weert weer jeed mol 15 dernier tournois, also föffteihn Pennen ut Tours.

De annere Theorie hett mit de Lienen op dat Speelfeld to doon. Jeed mol, wenn en Speler bi’t Jeu de paume een Punkt maakt harr, güng he een Striepen wieter un keem so jümmer wieter in de Mitt vun’t Speelfeld. To’n Anfang vun’t Speel stünn he an de 0-Toll-Lien. Wenn en Speler en Punkt maakt harr, künn he na de 15-Toll-Lien vörrücken, denn na de 30-Toll-Lien un opletzt na de 45-Toll-Lien. Denn eerst harr he dat Speel wunnen. Man hett aver denn funnen, dat de Lien to dicht bi’t Nett weer un hett de letzte Angaav denn op 40-Toll torüch versett.

De „0“ warrt bi’t Tennis mit dat engelsche Woort Love tellt. Wohrschinelich liggt de Oorsprung dorvun in den Utdruck „to do something for love“, also „wat ümsünst doon“. En Speel, bi dat de Gegner keen Punkt kregen hett warrt dorüm ok as Love Game betekent. Jüst so gifft dat ok den Utdruck „neither for love nor for money“, de as Oorsprung för den Begreep in Fraag kummt. De Utdruck hett den glieken Sinn: Man kriggt „keen Leef un ok keen Geld“, also nix.^[1] Annere Borns seggt, dat Love kummt vun’t franzöösche l’œuf („dat Ei“), wat dat Utsehn vun de Null op de Anwiestafel weddergifft.^[2]

Ännern vun de Regeln

Vun wegen, dat dat bi’t Tennis keen Tietgrenz gifft, kann dat teemlich lang duern, bit dat en Winner faststeiht. Jümmer wedder warrt dorüm ne’e Regeln vörslahn, de dat Speel intressanter maken schüll un de Tiet verkörten. En Resultat dorvun weer to’n Bispeel dat Inföhren vun’n Tie-Break in de 1970er Johren, de dorför sorgen schüll, dat de Sätz nich to lang warrt. Bito gifft dat de No-Ad-Regel („No Advantage“), de beseggt, dat bi’n Speelstand vun 40:40 al de nächste Punkt över dat Speel befinnt. Man, disse Regel is opstuinns blots bi Dubbel-Poren insett worrn.

En Gegenbewegen is aver bi’n Hardplatz-Tennis to sehn. Dor sünd de Ballwessel teemlich kort, so dat överleggt worrn is, de Speelduer wedder to verlängern un dat Speel intressanter to maken. Bi eenige Turneren warrt al gröttere Tennisbäll insett, üm de Slagsnelligkeit sieter to maken. Ok en högere Nettkant oder dat Weglaten vun’n tweeden Opslag sünd al diskuteert worrn, üm de Snelligkeit vör allen bi’n Opslag rünner to setten. Bit hüüt sünd disse Vörslääg aver nich wieter acht worrn.

Noch en Ännern is de so nöömte Champions-Tie-Break. De warrt as en normalen Tie-Break speelt, is aver eerst bi teihn Punkten toenn an Steed vun söven. Anfangs weer dat inföhrt, üm vör allen öllere Spelers de Anstrengen vun’n drüdden Satz to sporen. An de Steed warrt blots noch de Champions-Tie-Break speelt. In de Twüschentiet warrt de aver ok bi de Aktiven in ’n Speelbedriev un bi Turneren anwennt.

Speeltechnik

Grund-Slagoorden

Vörhand

Bi de Vörhand (eng. Forehand) warrt de Ball op de Siet vun de Slaghand speelt, also rechts bi’n Rechtshänner un links bi’n Linkshänner. Normalerwies warrt bi’n Vörhandslag uthollt un de Ball ruchweg in Hööch vun de Hüft an de Siet vun’n Lief drapen.

Rüchhand

Bi de Rüchhand (eng. Backhand) warrt de Ball op de Siet gegenöver vun de Slaghand speelt. De Bewegungsafloop is in’n Gegensatz to de Vörhand wat kumplizeerter un sworer dörtoföhren. Dat gifft dorför twee Mööglichkeiten, de eenhannige und de tweehannige Rüchhand. De beidhannige Rüchhand is eerst siet de 1970er Johren begäng un warrt siet de Tiet lehrt. Se warrt vör allen Anfangers mit op’n Weg geven, vun wegen dat se weniger Kraft bruukt as de einhannige Rüchhand.

De Rüchhand-Slice warrt tomeist mit een Hand slahn.

Opslag

Hööftartikel: Opslag (Tennis)

De Opslag (eng. Service) is de Optakt vun’n Ballwessel. Dorto warrt de Ball achter de Grundlien in de Luft smeten un in’n allgemenen so hooch as mööglich drapen. De Ball warrt schraagöver’t Feld in de gegenöverliggen Opslagzoon vun’n Gegner slahn.

Man, dat is nich gegen de Regeln, den Ball ok op en annere Oort un Wies as mit den Slag över’n Kopp in dat Feld vun’n Gegner to slahn. De Vördeel is aver bi den Överkoppball (ok Smetterball nöömt, oder op engelsch Smash), dat dormit de hööchste Snelligkeit tostannen kummt, wat för den Gegner sworer antonehmen is.

Sünnere Beteken för Slääg

Return

De Return („Opslagtorüchslag“) is de Slag, mit den de Opslag vun’n gegner wedder torüchspeelt warrt. De Opslag (oder ok de Smetterslag) is de gaueste un hardste Slag in’t Tennis un dorüm teemlich sowr torüchtospelen (to „returneeren“). De tweete Opslag warrt tomeist en beten weker slahn, wat för den Gegner ’n wat aggressiver’t Return-Verhollen mööglich makkt.

Smetterball

Vun de Bewegung her is de Smetterball (eng.: Smash) dat glieke as de Opslag. Dat is also ok en Överkoppslag mit hoge Snelligkeit. Faken warrt de Smash as Reakschoon op’n versöchten Lob vun’n Gegner speelt un stellt de kraftvullste Angreepsoort dor.

Passeerslag

De Passeerslag kann mit de Vörhand oder de Rüchhand speelt warrn. Bi dissen Slag warrt de Ball an den Gegner vörbi speelt, dat he dor nich rankamen kann, wenn he dicht bi’t Nett steiht.

Lob

De Lob warrt speelt, wenn de Gegner teemlich wiet vörn in’t Feld steiht. Dorbi warrt versöcht, den Ball hooch över sien Kopp na achtern in sien Feld to spelen. Warrt de Lob aver to kort oder to flach ansett, kann de Gegner mit en Smetterslag reageeren oder den Ball noch achteranlopen un torüchspelen. Üm disse Gefohr to ünnerbinnen, warrt verwsöcht den Lob mit Topspin („Vörwärtsdrall“) to spelen, üm dat de Ball bi’t Opkamen noch mol gauer warrt.

Stopball

En Stop warrt so speelt, dat de Ball blots wenige Zentimeter achter’t Nett „rünnerfallt“. Dat is begäng, den Ball dorbi tosätzlich mit’n Backspin („Torüchoorsdrall“) antosnieden, üm dat he bi’t Opdrapen nich wieter na vörn springt, man villicht sogar torüch in’t Richt op’t Nett.

Volley

As’n Volley („Flaagball“) warrt en Slag betekent, bi de de Ball torüchslahn warrt, noch vördem he op’n Bodden opkamen is. Disse Slääg warrt normalerwies dicht an’t Nett speelt. Dorvun gifft dat ein poor Sünnerformen:

De Halfvolley is an sik keen echten Volleyslag. So warrt Slääg nöömt, de kort na’t Opkamen op’n Bodden speelt warrt. Mit dissen Slag kann een kuum Druck op den Gegner maken, dorüm warrt de ok blots as’n Nootlösen bruukt, wenn keen annern Slag geiht.

De Volleystop is en Slagtechnik, bi de ut’n gegnerischen Flaagball en Stop maakt warrt. Disse Slag is nich eenfach, vun wegen dat de Snelligkeit ut den Slag vun’n Gegner nahmen warrn un de Ball dicht achter de Nettkant platzeert warrn mutt.

En sünnere Form vun’n Volley is de Heekvolley, bi den versöcht warrt, en Passeerslag vun’n Gegner dör en Sprung doch noch to kriegen un torüchtospelen. Bekannt worrn is disse Slag dör Boris Becker. Utklamüstert hett sik disse Technik oorsprünglich en Jöögdtrainer vun Becker, üm dormit de Reckwiet vun Nawassspelers an’t Nett grötter to maken. Becker hett den Slag in sien Repertoire behollen un hett em to’n Överraschen vun sien Gegners faken ok bi internatschonale Turneren mit Spood insett.

Topspin

Hööftartikel: Topspin

De Topspin is de fakenste Slagoort in’t moderne Tennis. Topspin bedüüt, dat de Ball en Vörwärtsrotatschoon maakt. Dördor warrt de Flaagkurv vun’n Ball licht krumm un dat Afsprungverhollen vun’n Bodden ännert sik. Dat hett den Vördeel, dat ok gaue oder hooch speelte Bäll noch in’t Feld opkamen doot un de Gegner den sworer nehmen kann.

Slice

Bi’n Slice kriggt de Ball en Roatschoon na achtern mit (eng. Backspin), also jüst in de annere Richt as bi’n Topspin. De Ball kann dordör bannig flach över’t Nett flegen un springt na’t Opkamen kuum mehr af. De Slag kann to’n Angriepen insett warrn: Dör de längere Flaagtiet hett de Speler na’n Slag mehr Tiet, an’t Nett vörtogahn. Jüst so kann de Slice ok bruukt warrn, üm sik ut en Bedrängnis free to maken, also to’n Bispeel üm bi’n harden Opslag mehr Tiet to winnen. De Slice kann blots langsom speelt warrn, vun wegen dat he anners dör sien flache Flaagkurv över de Butenlien „seilt“. Vundaag warrt normalerwies ok vun de Grundlien ut Angreepstennis speelt. Dorüm is de Slice vundaag nich mehr so begäng as fröher.

Cross

De Cross-Ball warrt dweer slahn, dat heet in de schraag gegenöver liggen Eck vun’n Platz. Dorna speelt en Rechtshänner en cross slahn Vörhand en rechtshännigen Gegner ok wedder op de Vörhand un ümkehrt. Vun wegen dat de Diagonaal länger is as de Sietenlien künnt hardere un sorüm wieter flegen Bäll cross slahn warrn.

Longline

Longline („an de Lien lang“) warrt en Ball speelt, de an de gegenöver liggen Eck vun’n Platz parallel to de Sietenlien slahn warrt. Dat heetm, dat en Rechsthänner en longline slahn Vörhand den rechtshännigen Gegner op de Rüchhand anspeelt. Hollt sik de utföhren Speler buten vun’t Speelfeld op, kann he mit’n Longline-Slag ok an de Siet vun’n Nettposten vörbispelen.

Ass

En Ass (eng. Ace) is en Opslag, bi den de Ball vun’n Gegner nich mehr kregen warrn kann. Dat kann bi’n eersten Opslag aver jüst so ok mit’n tweeten Opslag vörkamen. De Begreep Ass warrt aver nich mehr bruukt, wenn de Gegner noch in jichtenseen Oort mit den Släger an den Ball rankamen is – ok wenn he em nich mehr richtig torüchspelen kann. Dorto seggt man denn ok Service Winner.

Speelfeld

Dat Speelfeld bi’t Tennis is rechteckig un warrt dör dat Nett in twee Hälften deelt. Dat Speelfeld hett en Läng vun 78 Feet (23,77 m), een Speelfeldsiet dorna also 39 Feet oder 11,89 m. De Breed is för’t Enkel 27 Feet (8,23 m), för’t Dubbel 36 Feet (10,97 m). Begrenzt warrt dat Feld dör Lienen, de as Bestanddeel vun’t Feld sehn warrt. Dat sünd de Grundlienen un de Sietenlienen. Wenn en Ball (ok blots deelwies) op een Lien fallt, denn is de noch binnen dat Feld. In’t professionelle Tennis warrt deelwies Videobewiesen insett, üm över kritische Fäll to befinnen.

De Grundlienen verloopt parallel to’t Nett, de Sietenlienen piel dorto. Parallel to’t Nett gifft dat op beide Sieten in’n Afstand vun 21 Feet (6,40 m) de so nöömten Opslaglienen. De Flach twüschen dat Nett un de Opslaglienen warrt inoffiziell ok as T-Feld betekent, as de Opslagmiddellien, de dat T-Feld in twee gliek grode Flachen ünnerdeelt un de Opslaglien en groot ‚T‘ billt. Entspreken warrt de Opslaglien ok as T-Lien betekent. De beiden Flachen vun’t T-Feld sünd de beiden Opslagfeller.

Dat Nett is in de Mitt 3 Feet (0,914 m) hooch un geiht an beid Sieten jüst so veel ok över de gellen Sietenlien rut. Dor an de Sieten mutt dat Nett en Hööch vun 3,5 Feet (1,07 m) hebben.

De Afstand vun de Grundlien na’t Intünen bedriggt twüschen 18 un 25 Feet (5,50 bit 6,40 m), twüschen de Sietenlienen un de Intünen mutt de Afstand bi ruchweg 10 bit 12 Feet (3,04 bit 3,66 m) liggen.

Dat Tennisfeld kann verscheden Belääg hebben. Dat kann en Sand-, Rasen,- Kunstrasen-, Teppich-, Kunststoffgranulat- oder Hardplatz wesen. In’t Fre’e sünd vör allen Sandplätz begäng, in de Hall warrt vör allen op’n Hart- oder op’n Granulatplatz speelt.

Speelstrategien

Serve and Volley

Bi dat Serve-and-Volley-Speel geiht de opslahn Speler foorts an’t Nett, wenn he en goden Opslag maakt hett, üm dat he den vun’n Gegner spelten Return dör en Volley torüchspelen kann, ahn dat de Gegner dor ran kummt. Disse Strategie is sünners goot to maken op gaue Belääg as op Rasen. Dör den Volley warrt de Reakschoonstiet för den Gegenspeler bannig verkört, as de Ball nich so en wieten Weg maken muut, vördat he torüchslahn warrt. En goot ansetten Volley is dorüm in de meisten Fäll en direkten Punkt un sport den Angrieper de langen Loopweeg. Riskant is aver de Positschoon dicht an’t Nett, as de Torüchslahn Speler normalerwies in Laag wesen schüll, en Passeerslag to maken. Von sünnere Bedüden is dorüm, woans de Nettangreep vörbereidt is. Mit en goden Slag vörweg kann de Angrieper dorför sorgen, dat de Gegner em nich passeeren kann, so dat de Volley mööglich warrt.

Disse Taktik is fröher vun vele Spelers ut de Weltspitz anwennt worrn. Tyypsche Serve-and-Volley-Spelers weern t. B. Pete Sampras, Stefan Edberg, Boris Becker oder John McEnroe. Vundaag sünd de meisten Spelers aver ok jümmer mehr in de Lagg mit veel Druck vun de Grundlien to spelen, so dat de Strategie jümmer weniger to’n Tog kummt. En poor Profispelers maakt tomindst phasenwies jümmer noch en spoodriek Serve-and-Volley-Speel.

Grundlienenspeel

Bi’t Grundlienenspeel blievt beide Spelers an jemehr Grundlien stahn un spellt den Ball hen un her. Dorbi versöökt se en Vördeel ruttospelen, dordör dat se den Ball op de Siet speelt, de vun’n Gegner wieter weg is, oder de Ball warrt gegen de Loopricht vun’n Gegner speelt. Mit disse Strategie gifft dat meist eerst en Punkt, wenn mehrere goot ansette Slääg achterenanner speelt worrn sünd. De vörherrschen Slag is dorbi de Topspin, vun wegen dat de Slag – achter den Smetterball – as de effektivste Slag ansehn warrt.

Chip and Charge

Bi disse Strategie versöcht de torüchslahn Speler, den Opslag direkt mit en Angreep to returneeren (chip). Dorbi geiht he foorts an’t Nett vör un versöcht denn den Punkt dör en Volley to maken. Disse Afloop warrt meist blots bi’n tweeten Opslag maakt, vun wegen dat de nicht so hard slahn warrt. Wenn disse Affolg klook insett warrt, kann se op den Gegner teemlich överraschen wesen.

Turneerbedriev

De court central vun’t Stadion Roland Garosse in Paris

Dat professionelle Tennis warrt vör allen vun internatschonale Turneren bestimmt, de dat hele Johr dör stattfinnt un tomeist in’t K.O.-System utspeelt warrt. De Dackorganisatschoon för dissen Turneren is bi de Fronslüüd de WTA, bi de Mannslüüd de ATP. Bi disse Turneren warrt ok Punkten för de Tennis-Weltranglisten vergeven. De Rang in disse List entscheedt annersrüm wedder doröver, wokeen an en Turneer deelnehmen dröff un an welke Steed op’n Speelplan he sett warrt.

De Turneren, de dat meiste Ansehn in’t Tennis bringen doot, sünd de veer Grand-Slam-Turnerem, de vun’n Tennisweltverband ITF utdragen warrt, as ok de Tennis Masters Cup bi de Mannslüüd oder de WTA Tour Championships an’n enn vun de Saison. Bi de Mannslüüd folgt dorna in de Reeg de ATP Masters Series mit negen Turneren.

Grand-Slam-Turneren

Hööftartikel: Grand Slam (Tennis)

Mannschoppswettkämp

Profitour

Tennisverbännen in Düütschland

In Düütschland warrt de Tennissport vun’n Düütschen Tennis Bund (DTB) organiseert, de sik in Landsverbännen opdeelt. De DTB organiseert den Ligaspeelbedriev, de Turneren, de Natschonalmannschop (för’n Daviscup oder den Fed. Team Cup) un billt ok de Tennistrainers ut.

Vun de Landsverbännen oder vun jemehr ünnerordent Bezirken warrt in all Öllersklassen Mannschopswettkämp, de so nöömten Medenspelen organiseert. Dorbi warrt op de Amateureven vun de Kreisklass för Freetietsportler bit rop na de Verbands- oder Regionalliegen üm Op- un Afstieg kämpt. Den Böverbo mit Utrichten to’n Profitennis (bi de aktiven Forns- un Mannslüüd) billt de 1. un 2. Bundssliga, de vun’n DTB organiseert warrt.

Borns

Literatur

Peter Scholl: Richtig Tennis. München, BLV Buchverlag GmbH & Co., 5., ne bearb. Opl., 2006, ISBN 3-8354-0012-6
Theo Stemmler: Vom Jeu de paume zum Tennis. Eine Kurzgeschichte des Tennisspiels. Frankfort an’n Main, Insel Verlag 1988 (Insel-Bökeree 1076/2)

Websteden

[1] The Guinness Book of Tennis Facts & Feats

[2] Der mit dem Maul wirft

[1]

[2]