Tarmster Utstellung

Vun Wikipedia

De Tarmster Utstellung is en veer Daag lange Utstellung in Tarmst, de allens to de Themen Bueree, Landtechnik, Goorn- un Landschopspleeg, erne’erbore Energien un Deertucht wiest.

Historie[ännern | Bornkood ännern]

De Utstellung geiht trügg op dat Johr 1948, as in’n Harvst de Gemeenraad von Tarmst daagt un na Ideen söcht hett, de Weertschop in’n Oort en beten in Swung to kriegen.[1] Dat weer de Idee von Moritz Deter, en Utstellung mit Bueree-Maschinen to maken.[1] Dor weer de Gemeenraad för un so geev dat 1949 de eerste Utstellung.[1] De weer an dat eerste Wekenenn in’n September, also to en Tied, wenn dat Koorn frisch inföhrt is un de Buurn Geld över hebbt, üm sik Landmaschinen to köpen.[1] 14.000 Lüüd sünd to disse eerste Utstellung kamen.[1]

In de eersten teihn Johren weer de Utstellung jümmer von Dunnersdag bet Sünndag, sietdem von Freedag bet Maandag.[1] Bet 1967 weer de Utstellung binnenoorts in Tarmst, op en Gelänn, dat toletzt 3 Hektar groot weer.[1] 1968 sünd se ruttagen op dat fre’e Feld in’n Süüdoosten von Tarmst an’n Wendohweg.[1] Dit Gelänn weer 1968 teihn Hektar groot, söss Hektar för de Stänn un veer Hektar för de Parkplätz.[1] 1968 hett dat 248 Utstellers geven.[1]

1978 harr de Utstellung 45.000 Besökers un 1996 91.000.[1]

Vondaag is de Utstellung an dat twete Wekenenn in’n Juli op en Areaal von 18 Hektar (Stand 2015).[2] Se harr 2015 bi 700 Utstellers un 100.000 Besökers.[3]

Footnoten[ännern | Bornkood ännern]

  1. a b c d e f g h i j k Historie op de Websteed von de Utstellung
  2. Am 10. Juli geht's los: Die 67. Tarmstedter Ausstellung, agrarheute.com an’n 9. Juli 2015
  3. Bauern sprechen sich Mut zu, NWZ online an’n 11. Juli 2015

Weblenken[ännern | Bornkood ännern]