Suspension (Chemie)
In’n Tosamenhang mit de Physik un de Chemie betekent en Suspension en heterogen (nich mischbor) Stoffmischen ut en Fletigkeit un en dorin fien verdeelten Faststoff. Disse warrt in de Fletigkeit fien verdeelt btw. opschlämmt. En Suspension is also en disperse faste Phaas in en kontinueerliche fleetige Phaas. Suspensionen mit Water as fletige Phaas warrt in de Warkstoffkunn oder bi natürlich Vörkamen ok as Opschlämmen betekent.
Sedimentatschoon[ännern | Bornkood ännern]
Warrt en Suspension längere Tiet stahn laten, sackt de Faststoff langsam as Sediment na’n Bodden af. Disse Vörgang warrt Sedimentatschoon nöömt un kamt in’n Gegensatz to en Suspension bi Lösen nich vör. Üm den Effekt vun de Sedimentatschoon langsomer to maken, warrt faken Thixotropeermiddel to de Suspension togeven. De baven stahnde Fletigkeit kann man afgeten (Dekanteeren) un so den Faststoff vun de Fletigkeit afscheden.
Wenn de Partikelgrött vun den Faststoff bannig lütt is, duert de Vörgang vun de Sedimentatschoon düchtig lang. Je lütter de Partikels üm so länger duert dat. Wenn man dat gaumaken will, warrt dorto en Zentrifoog bruukt.
Bispelen[ännern | Bornkood ännern]
Begäng Bispelen för Suspensionen sünd ünner anner’n:
- Opschlämmen vun Sand in Seewater, Sweevstoffen oder Drievsand.
- Mördel oder Beton (mineraalsch Suspensionen).
- Tusche oder Wandfarben (Pigmentsuspensionen; in’n Gegendeel to lööste Farvstoffen)
- Blood
- Drööv Fruchtsaft oder Hefeweten