Stratenbahn Cuxhoben

Vun Wikipedia
Zur Navigation springen Zur Suche springen

De Stratenbahn Cuxhoben oder Städtische Bahn Cuxhoben, faken Kanonenbahn nöömt, weer en Stratenbahn in Cuxhoben, de aver blots veer Weken lang föhrt hett.

Historie[ännern | Bornkood ännern]

1899 hett de Kriegsmarien in Cuxhoben, wat dunn noch to Hamborg höört hett, von’n Bahnhoff Cuxhoben an Fort Grimmershörn langs na Fort Kugelbaak en fiev Kilometer lange Bahn boot, üm Wapen un Munitschoon to transporteren.

1911 hett de Stadt dat eerste Maal beraden, wat se dor nich en Stratenbahn op inrichten wullen. 1912 hebbt se ok de Marien dor na fraagt. 1913 hett de Marien toseggt, dat dor en Stratenbahn inricht warrn kunn, wenn de Marien man dat Recht behollen schull, dat se den Stratenbahnbedriev wedder stoppen köönt, wenn de Marien de Bahn wedder kumplett sülvs bruukt. De Raad hett denn mit grote Mehrheit beslaten, de Stratenbahn intorichten.

För de Bahn weren bruukte Wagens von de Schmöckwitz-Grünauer Uferbahn vörsehn (herstellt von Van der Zypen & Charlier). De dree Drevwagens hebbt 14.000 Rieksmark dat Stück köst. De Fohrtüüg weren elektrisch bedreven, harrn aver en Benzolmotoor, de mit en Dynamo sülvs Stroom tüügt hett. An’n 19. März 1914 is de Bo von en Wagenhall utschreven worrn. De Stadt Hamborg hett an’n 5. Mai 1914 den Bedriev för en Tied von teihn Johr genehmigt. In en Verdrag mit dat Militär von Enn Mai is fastleggt worrn, dat de Bedriev foorts ophöörn mutt, wenn de Marien de Bahn sülvs bruken will. De Stadt harr ok de Plicht, de Afstell- un Utwiekgleisen op egen Kösten to boon un 80 Prozent von de lopen Kösten to övernehmen. De Bahn schull mit de Baadsaison apenmaakt warrn. De Fohrtüüg weren an’n 17. Juni dor un an’n 24. Juni hebbt se anfungen, de Fohrers uttobillen. An’n 6. Juli 1914, 6:22, hett de Stratenbahn denn anfungen to föhren.

De Fohrtied weer so 13 bet 15 Minuten un de Bahn harr alltohoop 15 Stopps. Aver al an’n 2. August 1914 weer dat wedder toenn mit de Stratenbahn, nadem de Eerste Weltkrieg utbraken weer un de Marien de Bahn wedder sülvs bruken wull. Na dat Enn von’n Krieg hett sik nüms funnen, de de Bahn wedder in Bedriev nehmen wull. An’n 19. Dezember 1919 is op de Streck en Buslien inricht worrn. De Wagens sünd 1921 för 300.000 Rieksmark an de Moerser Kreisbahn verköfft worrn.

De Bahn hett in disse Tied 6969,10 Rieksmark innahmen.