Steenkist von Hogenoh
De Steenkist von Hogenoh is en Steenkist ut de Bronztied, de in Hogenoh an de Straat in’t Krögerfeld bi’n Karkhoff funnen worrn is.
De Steenkist leeg in’n Oosterbarg un höört to en Grupp von Graffbargen op en Geestrügg. De Graffbargen sünd vondaag all afföhrt. Na’n Eersten Weltkrieg is de Oosterbarg bilütten afföhrt worrn. Dor is ok en üm un bi 2,5 m × 3,5 m groot Boomsark-Steenpacken bi tweimaakt worrn. 1930 hebbt se en loodrecht Steenplaat funnen, de de Steenkist afsluten dee.
De Boddendenkmaalpleger is denn ropen worrn un hett de Steenkist ünnersöcht. De Kist is dor nich wieder bi freeleggt worrn, dat dat Denkmaal in situ in’e Eer blieven kunn.
In de dree Viddel mit Sand füllte Kist weren blangen Knakenresten, de op dat Boddenplaaster legen, en Biel, en afbraken Stück von en Pook un en Fibel, all ut Bronz. Dör de Bronzstücken kunnen de Funnen relativ genau dateert warrn. Dat Biel is en Noordsch Randkantenbiel. De Wust ünner de Randkant is mit en Streekmunster smückt. De Typ Biel stammt ut de Periood 11 (1500-1250 v. Chr.) na Oscar Montelius. De Fibel un de Pook höört ok in de Öllere Bronztied. De Fibel ut twee Delen wiest Spiralen an Vör- un Achterenn von’n Bögel. De Bögel wiest Spiraallienen, de rundüm loopt. Von’n Pook is de gröttste Deel von de Kling, de Faatplaat mit en Angel un twee Neten nableven. Later is de Steenkist woll noch wedder för en Brandgräffnis apen maakt worrn.
De Versöök, de Steenkist an Oord un Steed to wohren, müss denn opgeven warrn. 1964 hebbt se de Kist kumplett utbuddelt. De Langsieden sünd von twee smalle Steen begrenzt. De Smallsied na Westen hen warrt von en gröttern un en lüttern Steen billt, de na Oosten hen von en enkelt Steen. De gröttste Deel von de Kist warrt von en groot Decksteen todeckt. En lüttern liggt över de Ingangssied. De Lück, de twischen de Decksteen blifft, is mit lüttjere Steen dichtsett worrn.
Dat Denkmaal liggt vondaag ünner grote Bööm an en Steed, de von wied to sehn is. Üm de Boomgrupp mit dat Denkmaal is en Tuun rüm.
Literatur[ännern | Bornkood ännern]
- Jürgen Deichmüller: Eine Steinkiste der älteren Bronzezeit bei Hagenah, Kr. Stade. In: Nachrichten aus Niedersachsens Urgeschichte. 34, 1965, ISSN 0342-1406, 83f.
Weblenken[ännern | Bornkood ännern]
- Indrag bi Megalithic.uk (engelsch)
Koordinaten:53° 32′ N, 9° 19′ O