Stanislas Wawrinka

Vun Wikipedia
Zur Navigation springen Zur Suche springen
Stanislas Wawrinka bi de US-Open 2013

Stanislas Wawrinka (* 28. März 1985 in Lausanne) is en Swiezer Tennisspeler, de siet 2002 up de Profitour speelt. An' 12. Mai 2008 stunn he eerstmals ünner de Top 10 vun de Tennis-Weltrangliste. Siet April 2013 wurrd he vun de ehmalgen sweedschen Tennisspeler Magnus Norman traineert, mit de he an' 26. Januar 2014 sien bitlang gröttsten Erfolg fiern kunn, den Titelgewinn bi den Australian Open. Dör dissen Sieg reck he in de Tennis-Weltrangliste den 3. Platz, wat bitlang sien best Platzeeren is. An' besten kummt he up Sandplatz und Hartplatz togang. Sie besünnere Stärke is sien eenhändig Rückhand.[1]

Kindheit un Jöögd[ännern | Bornkood ännern]

Stanislas Wawrinka is tosommen mit sien Bröer Jonathan un sien twee Süsters Djanaée un Naélla up en Buurnhoff in Saint-Barthélemy in den Kanton Waadt upwussen, de en Behinnertenheim anslooten is. Sien Grootvader, de ut Düütschland in de Swiez inwannert is, weer en Bio-Buur. Sien Vader Wolfram Wawrinka, fröher sülvst Buur, un sien Moder Isabelle Wawrinka arbeiten beid för dat Behinnertenheim.[2] Stanislas hett de Rudolf-Steiner-School in dat rund 12 km weg liggen Crissier besöcht.

Ton' Tennis keemen Wawrinka un sien dree Johr öllere Bröer Jonathan dör Früenden vun de Öllern ut den Elsass, deren Söhns Dimitri un Gregory Zavialoff up den Hoff vun de Wawrinkas hör Sömmerferien maaken un dor up den Tennisplatz spelen deen. Dimitri Zavialoff wurr later för 15 Johr de Trainer vun Wawrinka.

In' Tennisclub Echallens fung Wawrinka mit dat Tennis an. Wiel Dimitri Zavialoff mit de Utbillen to'n Tennislehrer dormals jüst fardig weer, wurr he vun de Öllern Wawrinka instellt. He wurr sien Trainer un togliek sien Früend. Mit 16 Johren reck he dat Halffinale vun de European Championships, dat sien latere Kontrahent Jo-Wilfried Tsonga winnen kunn.[3][4]

Karriere[ännern | Bornkood ännern]

Sien eerste Versöök up de Profitour hett he bi verscheeden 2002 ITF-Turnieren maakt. 2003 reck he sien eerst Finale in dat spaansch Cartagena, dat he gegen Iván Navarro in dree Satzen verlor. In dat sülvig Johr wunn he aber noch twee Turniere up de ATP Challenger Tour un nehm ok mit en Wildcard an Turnieren vun de ATP World Tour dee. Enn' vun dat Johr stunn he up Platz 171 up de Tennis-Weltrangliste. 2004 harr he all sien eersten Insatz för de Swiez in' Davis Cup. In' Juli 2005 speel he sück eerstmals in dat Finale vun en ATP-Turnier. Bi sien Heimturnier in Gstaad speel he gegen den Argentinier Gaston Gaudio, de hüm aber klor in twee Satzen slahn kunn. An' Enn' vun dat Johr stunn he all up Platz 55 vun de Weltranglist.

Dat Johr 2006 broch hüm tonächst verscheeden Halffinaldeelnahmen bi verscheeden Turniere, kunn aber ok sien eersten Turniersieg up de ATP World Tour fiern. Bi dat Turnier in dat kroaatsch Umag profitieer he dorbi in dat Finale bi den Stand vun 6:6 dorvan, dat sien Gegner Novak Đoković upgeven muss. An' Enn vun dat Johr 2006 stunn he denn up Platz 30 vun de Weltranglist.

Dat Johr 2007 leep för Wawrinka anfangs nich so good. He keem woll bi de Australian Open bin in de darte Runn, keem aber bi de nächst acht Turniere nie över de eerste Runn herut. In' Juli speel he sück denn bi dat ATP-Turnier vun Stuttgart bit in't Finale. Dor verlor he gegen den dormaligen Weltranglistentweeten Rafael Nadal mit 4:6 un 5:7. Bi de US Open överstunn he eerstmals bi en Grand-Slam-Turnier de eerst dree Runnen, bevör he in dat Achtelfinale gegen Juan Ignacio Chela nah fiev Runnen mit 6:4, 2:6, 6:7 (6:8), 6:1 un 4:6.

Beter leep dat in 2007 för hüm. Glieks bi dat eerst Turnier vun dat Johr stunn he in Doha in dat Finale vun dat ATP-Turnier, verlor dor aber gegen Andy Murray in dree Satzen.[5] Bi dat Masters-Series-Turnier vun Indian Wells schaff he eerstmals den Sprung in dat Veertelfinale vun en Masters-Turnier. Bi dat ATP-Turnier vun Barcelona stunn he in't Halffinale, verlor dor aber David Ferrer. Bi dat Masters-Series-Turnier vun reck he för dat Johr eerstmals dat Finale un bi disse Turnierreeg ok dat eerste Mal dat Finale, muss dat Endspeel aber gegen Novak Đoković aber in dree Satzen verloren geven. He keem aber dormit ünner de Top 10 vun de Tennis-Weltranglist. Nahdem he bi de French Open ok noch de darte Runn reckt harr, stunn he up Platz 9, sien bit dorhen hööchste Platzeeren. Bi de Olympisch Spelen 2008 in Peking wunn he tosommen mit sien Partner, den Weltranglisteneersten Roger Federer die Goldmedaille in' t Herrendüppel gegen de Sweeden Simon Aspelin un Thomas Johansson gewinnen.[6] Disse Goldmedaille weer de eerste groot Spood för Wawrinka.

Stanislas Wawrinka bi de US Open 2010

2009 geev dat blots een Turniersieg. Da Challenger-Turnier in Lugano kunn he up sein Naam schrieven. Bi de French Open keem he bit in Runn 3 un in Wimbledon bit in't Achtelfinale. An' Enn' vun dat Johr stunn he up Platz 21 vun de Weltranglist.

2010 fung mit de Finaldeelnahm in Chennai an, wo he gegen Marin Čilić nah twee Tie-Breaks verlor. Bi de Australian Open weer in de darte Runn ok weer Sluss, sien Gegner weer ok dor Čilić. In' April Wawrinka bi dat Turnier in Casablanca dat Finale gegen Victor Hănescu mit 6:2 un 6:3 un reck dormit sien tweeten Titel. Bi de French Open keem he bit in't Achtelfinale. Af August 2010 weer Peter Lundgren de nee Trainer vun Wawrinka,[7] kört tovör harr he sück vun sien langjohrigen Trainer Dimitri Zavialoff trennt.[8] Spood broch dat woll, bi de US Open reck Wawrinka to'n eersten Mal överhoopt dat Veertelfinale vun en Grand-Slam-Turnier, verlor dor aber knapp in fiev Satzen gegen Michail Juschny. In' September 2011 geev Wawrinka denn aber bekannt, dat he de Tosommenarbeit mit Peter Lundgren per sofort beennen dee un de Saison ahn Trainer wiederführen wull.[9][10]

Stanislas Wawrinka bi de Olympisch Spelen 2012 in London

In' Januar 2012 kunn he in Chennai en Turniersieg erringen, as he in dat Endspeel den Belgier Xavier Malisse dwingen kunn. Bi de Australian Open in't Veertelfinale un bi de French Open in't Achtelfinale is he jeweils an Roger Federer in dree Satzen scheitert. In Wimbledon un bi de US Open weer jeweils in de tweet Runn Sluss.

Bi de Olympisch Spelen hett he ok nichts reeten, weer aber bi de Eröffungsfier Fahnendräger vun de Swiez.[11]

Dat Johr 2013 leep weer nich so good an. Bi dat Turnier in Chennai, weer he as Nummer veer sett, verlor aber all in dat Veertelfinale gegen Aljaž Bedene. In't Düppel kunn he dorgegen mit sien Partner Benoît Paire dat Endspeel gegen de beid Düütschen Andre Begemann un Martin Emmrich düütlich in twee Satzen winnen. Bi de Australian Open keem he nich över dat Achtelfinale herut. Dree Week later, bi dat Copa Claro in Buenos Aires, weer as Nummer 3 sett un keem ok in't Endspeel, verlor dor aber gegen den an Nummer 1 sett Spanier David Ferrer in dree Satzen. In dat Johr harr he denn as neen Coach Magnus Norman, den he probewies bit to de French Open anhüert harr.[12] Bi dat Turnier in dat portugeesch Oeiras stunn Wawrinka in't Finale weer David Ferrer gegenöver, de he ditmal aber in twee Satzen 6:1 un 6:4 besiegen kunn. Dat weer togliek sien veert Eenzeltitel up de ATP Tour.[13] Een Week later stunn he bi de Madrid Masters weer in't Endspeel un verlor dor gegen de Sandplatzkönig Rafael Nadal in twee Satzen, keem dormit aber weer eerstmalig siet Oktober 2008 ünner de best 10 vun de Weltranglist.[14] Bi de French Open in dat glieker Johr keem he eerstmalig in dat Veertelfinale, wo he gegen Rafael Nadal kien Mögelkeit to winnen harr.

Bi de US Open kreeg Wawrinka stark Gegner. In de eerst Runn is he up Radek Štěpánek drapen, gegen den he tovör veermal nicht winnen kunnt harr, ditmal allerdings woll. Sien nächste Gegener weern denn Ivo Karlović (in dree Satzen besiegt) un Marcos Baghdatis, de he in veer Satzen besiegen kunn. In dat Achtelfinale stunn hüm denn mit Tomáš Berdych de eerste sett Speler gegenöver, de he ok in veer Satzen besiegen kunn. In dat Veertelfinale weer sien Gegner Andy Murray, de he klor in dree Satzen in Schach hollen dee. Dormit truck Wawrinka eerstmals in en Halffinale vun en Grand-Slam-Turnier in, wo he mal weer up den Weltranglisteneersten Novak Đoković drapen dee, de hüm ok weer besiegen kunn, aber ditmal ok 5 Satzen dorto bruuk.[15] Dornah geev dat eerstmal kien ganz groot Erfolge mehr, in de Weltrangliste keem he aber immer wieder nah baben. An' 31. Oktober 2013 hett he sück eerstmals in sien Loopbahn för de ATP World Tour Finals, indem he sien Achtelfinalpartie gegen Nicolás Almagro bi de Paris Masters winnen kunn un later sien Kontrahent Milos Raonic sien Partie verlor.[16] In de Gruppenphase is he dorbi up den Weltranglisteneersten Rafael Nadal, de sien spaansch Landsmann David Ferrer un Tomáš Berdych. Wiels he gegen Nadal eenmal mehr verlor, kunn he de beid anner Gruppengegner jeweils in dree Satzen besiegen un bi sien eerst Deelnahm glieks in dat Halffinale intrecken, wo denn aber Novak Đoković weer beter weer. Dat Johr hett Wawrinka denn up Platz 8 vun de Weltranglist afslooten.

Eerst Grand-Slam-Sieg bi de Australian Open (2014)[ännern | Bornkood ännern]

In' November 2013 geev Wawrinka bekannt, dat he de Tosommenarbeit mit Trainer Magnus Norman verlängern un intensiveeren würr.[17] Norman harr sück dorför entscheeden, den Swiezer tokünftig fakender bi sien Wettkämpe to begleiten. Un dat Johr 2014 fung för Wawrinka besünners good an. Glieks bi dat eerste Turnier vun dat Johr kunn Wawrinka den Titel in Chennai winnen. Mit en Tweesatzsieg över Édouard Roger-Vasselin wunn he dorbi eerstmals en Turnier düppelt, nahdem he all 2011, dormals in't Finale gegen Xavier Malisse, dor den Titel wunnen harr.

Den gröttsten Spood in sien bitherig Loopbahn weer de Titelgewinn bi de Australian Open. In sien eerst Finale bi en Grand-Slam-Turnier kunn he Rafael Nadal in veer Satzen besiegen, nahdem he in dat Veertelfinale endlich mal Novak Đoković slahn kunn.[18] Dör dissen Sieg hett he sück en Priesgeld vun rund 2,14 Mio. Schweizer Franken inspeelt un rück an' 27. Januar 2014 up Positschoon 3 vun de Tennis-Weltrangliste vör.[19]

Speelstil[ännern | Bornkood ännern]

Sien Rückhand un sien Upslääg, de en Geschwindigkeit van bit to 232 km/h recken, gellen as sien besünnere Stärken. In' Allgemeenen is he en offensiver un kraftvull Speler, de meest vun de Grundlien ut speelt. Sülvst wenn he vun den Gegner ünner Druck sett wurr, schafft he dat mit en Slice immer weer, sien Gegner an de Grundlien to hollen un dat Tempo ut dat Speel to nehmen. Bi de Platzverhältnisse hett he kien Probleme, he kann up all Belääg good spelen, allerdings kummt he up Sand- und Hartplatzen besünners good torech.

Sien Swaakpunkt weer lang Tiet dat Inbreeken in wichtig Spelen. Dat hett he aber nu wat beter in Greep kreegen, wobi Trainer Magnus Norman dor ok grooten Wert up leggt.

Utteknungen[ännern | Bornkood ännern]

An' 11. Januar 2014 wurr Wawrinka to'n Schweizer des Jahres 2013 wählt un wurr dormit Nahfolger vun de Skilanglöper Dario Cologna.[20]

Persönliches[ännern | Bornkood ännern]

Wawrinka hett sowohl de düütsche as ok de Swiezer Staatsbörgerschap. Sien Vader Wolfram is düütsch, de Moder Isabelle Swiezerin. Sien Börgeroort is Hallau (SH).[21]

Siet 2009 is Wawrinka mit sien langjohrig Früendin Ilham Vuilloud verheiraadt.[22] In' Februar 2010 keem de gemeensam Dochter Alexia to Welt.[23]

Sonstiges[ännern | Bornkood ännern]

Wawrinka wurrd faken mit de Naam „Marathon-Man“ oder „Marathon-Stan“ betekent, wiel he bi gröttere Turniere immer weer Spelen över de vull Distanz vun dree bzw. fiev Satzen speelt, de hart umkämpt sünd.

Weblenken[ännern | Bornkood ännern]

Commons-logo.svg Stanislas Wawrinka. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Stan Wawrinka: One-Handed Backhand Expert atpworldtour.com van' 23. Mai 2013
  2. Stanislas Wawrinka: Der scheue Junge vom Bauernhof in Saint-Barthélemy, Aargauer Zeitung van' 26. Januar 2014
  3. Die Kunst des Verlierens, "Das Magazin" ut dat Heft van' 21. Juli 2012
  4. Die Welt des Tennis-Hoffnungsträgers, schweizer-illustrierte.ch van' 5. September 2013
  5. Andy Murray wins fourth ATP title, telegraph.co.uk van' 6. Januar 2008
  6. [http://www.swissolympic.ch/it/desktopdefault.aspx/tabid-3362/4457_read-25431/4457_page-3/ swissolympic.ch
  7. Lundgren neuer Wawrinka-Coach in Schweizer Fernsehen van' 15. Juli 2010
  8. Wawrinka trennt sich von Trainer Zavialoff, Blick.ch van' 27. Juni 2010
  9. Wawrinka trennt sich von Coach Lundgren, 20min.ch, afropen an' 19. September 2011
  10. Wawrinka Parts Company With Lundgren, atpworldtour.com, afropen an' 20. September 2011
  11. "Stanislas Wawrinka trägt die Schweizer Fahne an der Eröffnungsfeier", swissolympic.ch, afropen an' 24. Juli 2012
  12. Wawrinka testet Coach Norman, NZZ.ch, afropen an' 16. April 2013
  13. Wawrinka gewinnt in Oeiras, NZZ.ch, afropen an' 5. Mai 2013
  14. Stanislas Wawrinka wieder unter den Top-10, NZZ.ch, afropen an' 13. Mai 2013
  15. Wawrinka scheitert in 5 Sätzen an Djokovic, srf.ch, afropen an' 7. September 2013
  16. Wawrinka & Gasquet Complete Barclays ATP World Tour Finals Field, barclaysatpworldtourfinals.com, afropen an' 31. Oktober 2013
  17. Wawrinka intensiviert die Zusammenarbeit mit Coach Norman, NZZ.ch, afropen an' 3. Dezember 2013
  18. Wawrinka gewinnt die Australian Open in vier Sätzen, Blick.ch van' 26. Januar 2014
  19. Zwei Millionen Franken und die Weltnummer drei, Blick.ch van' 26. Januar 2014
  20. Stanislas Wawrinka zum «Schweizer des Jahres» gewählt, srf.ch, afropen an' 11. Januar 2014
  21. Ein Hallauer Bürger im Rampenlicht der Welt, Klettgauer Zeitung van' 21. November 2013
  22. Frisch verheiratet!, schweizer-illustrierte.ch, afropen an' 15. Dezember 2009
  23. Das ist Töchterchen Alexia, schweizer-illustrierte.ch, afropen an' 17. Februar 2010