Skamandrios (Maand)

Skamandrios is de Naam vun den Maand, de sik üm den Jupiter-Trojaner (624) Hektor dreiht, de in den Lagrange-Punkt L₄ vör den Planeten Jupiter op den sien Bahn lopen deit. Sien Grött bedriggt ruchweg en Twintigstel vun den Asteroid.

Naam un Opdecken

De Maand is an’n 16. Juli 2006 vun en Koppel vun Astronomen opdeckt worrn, de mit Hülp vun adaptive Optik mit dat 10-m-Teleskop Keck II op’n Mauna Kea arbeit hebbt. De Grupp bestünn ut Franck Marchis, Michael H. Wong, Jérôme Berthier, Pascal Descamps, Daniel Hestroffer, Frédéric Vachier, D. Le Mignant un I. de Pater.

Vergleken mit de opstunns dree annern Trojaner-Maanden, is Skamandrios teemlich lütt un dormit nich Deel vun en Dubbelsystem. Man kann hier also vun en ‚echten‘ Maand snacken – anners as to’n Bispeel bi dat System (617) Patroclus/Menoetius. Bit hüüt is dat ok de eenzige Maand vun en L₄-Trojaner, de as dat Greeksche Koppel betekent warrt. Bekannt maakt weer de Opdecken an’n 21. Juli 2006. De Maand harr toeerst de vörlöpige Beteken S/2006 (624) 1.

Den offiziellen Naam hett he eerst in’n März 2017 kregen, na de Figur Skamandrios ut de greekschen Mythologie, de in’n Trojaanschen Krieg op de Siet vun Troja gegen de Achaier streden hett, man al in de eersten Slacht vun Menelaos an de Siet maakt weer.

Ümloopbahn

Skamandrios hett en bannig elliptische Ümloopbahn üm Hektor mit en middleren Afstand vun 623,5 km to Hektor sien Middelpunkt, dat is ruchweg 2,75 mol de Radius vun Hektor. De Bahn hett en Exzentrizität vun 0,31 un en Negen vun 45°, wat för en Asteroidenmaand in’n Vergliek to de Maanden in’n Hööftgördel teemlich veel is. De snaaksche Ümloopbahn un ehr Bestännigkeit in’n Tosamenhang mit Hektor sien längliche Form is noch nich vullstännig verstahn, man Ünnersöken wiest dorop hen, dat se över Millionen vun Johren bestännig is.

För een Ümloop üm Hektor bruukt Skamandrios 2 Daag, 23 Stünnen un 9,7 Minuuten. Dormit kreist Skamandrios in een Hektor-Johr (ruchweg 12,05 Johren) üm un bi 1484 mol üm den Asteroid.

Egenschoppen

Dat kann angahn, dat vele Trojaner-Asteroiden Planetesimalen sünd, de bi de Migratschoon vun de Gasplaneten in de Lagrange-Punkten vun’t Jupiter-Sünn-System vör 3,9 Milljarden Johren infungen worrn sünd.

De naue Gestalt vun Hektor is nich klor, man he wiest en längliche Form op. Toeerst güng de Wetenschop wegen de gauen Rotatschoon vun den Asteroid vun en ellipsoide Form ut, man ne’ere Ünnersöken vun de Lichtkurven düüdt eher op en külen- oder hantelförmig Figur hen. Dat künn wedder op en Versmölten vun twee Oor-Komponetnen hendüden. Mööglicherwies is de Maand en Stück, dat bi’t vergliekswies langsome Tohopenstöten vun twee iesige Asteroiden entstahn is, bi de dat Heltor-System tostannen kamen is. Disse Theorie künn ok de sünnerbore Bahn vun Skamandrios verkloren.

Dat warrt annahmen, dat de Dicht vun’t System mit de vun’t Patroclus/Menoetius-System to verglieken is. Man, de Hööftkörpers hebbt an sik ünnerscheedliche physikaalsche Egenschoppen, so dat de beiden Systemen villicht verscheden tohopensett sünd.

Weblenken

• Wm. Robert Johnston: (624) Hektor and S/2006 (624) 1 (engelsch)
• Franck Marchis: Bild vun (624) Hektor un S/2006 (624) 1 (2011, engelsch)