Sibet Attena

Sibet Attena, latiensch ok: Sibo, (* üm un bi 1425; † 8. November 1473) weer en oostfreesch Hööftling. He weer en Söhn vun Sibet vun Dornum (olde Sibet) († 1433) un Frouwa von Manslagt, en Dochter vun Enno Cirksena.

Vun sien Vader hett he de Osterburg in Dornum arvt. Över sien eerste Frun, Onna vun Steesdörp, Dochter vun Hero Omken d.Ä., hett he todem 1447 Steesdörp arvt un kreeg 1454 as Neffe un trüe Gefolgsmann vun Ulrich Cirksena de Rechte in Esens. He hett aber dorvan afsehn, dat Arv vun sien Moder in Manslagt antonehmen. Ebenfalls in dat Johr 1454 hett he Ulrich Cirksena gegen Tanne Kankena in Wittmund ünnerstütt, hett de sien dortige Borg besett un hüm verdreeven. Söben Johr later hett he hüm mit sien Rechten in Dornum affunnen. Sibet Attena hett sück all siet 1455 Hööftling to Esens, Steesdörp un Wittmund nömmt. Dormit konkretiseer sück dat Harlingerland as Herrschapsterritorium.

Nahdem Onna vun Steedsdörp 1464 storven weer, hett he in tweet Ehe Margarethe vun Westerwolde heiraadt.

Sibet weer 1464 bi de fierlich Verleehn vun de Rieksgrafschap an Ulrich Cirksena in de Gasthuuskark to Emden dorbi un wurr bi disse Gelegenheit to'n Ridder slahn.

Nah sien Tod hett man hüm 1473 in de Kark vun Esens, de hüüdige St. Magnus-Kark, en prachtvull Sandsteensarkophag upricht. En Straat in Esens is ebenfalls nah hüm nömmt wurrn.

Kinner ut 1. Ehe:

Wibet, * …, verheiraadt mit Tyader vun Jever (ahn Afkömmlinge),
Hero vun Dornum = Hero Omken, verheiraadt mit Armgard, Gräfin vun Ollnborg,
Frouwa, verheiraadt mit Edo Wiemken den Jüngeren , Hööfttling vun Jever († 1497 tosommen mit de dree Döchter ut disse Ehe an de Pest)

Kinner ut 2. Ehe:

Ulrich vun Dornum
Sibo (ahn Afkömmlinge)

Literatur

Karl Ernst Hermann Krause: Sibo. In: Allgemeine Deutsche Biographie (ADB). Band 34, Duncker & Humblot, Leipzig 1892, S. 138 f.