Samina (Stroom)
| Samina | |
|---|---|
| Laag | Liechtensteen, Öösterriek |
| Stroomsystem | Rhien |
| Läng | 10 km |
| Afströömrebeed | 71 km² |
| Münn | in Frastanz in de Ill (op 469 m över de See) |
| Waterkenntall | AT: 812202 |
 | |
De Samina (oder ok Saminabach) is en Wildwater-Stroom in Liechtensteen un Öösterriek (Bundsland Vorarlberg), de in de Ill münnt. De Stroom flütt in de Alpen un hett dor dat Saminadaal billt, wat dat westlichste Daal in’n Rätikon un en Siedendaal von’n Walgau is.
De Samina sülvs is teihn Kilometer lang (twee Kilometer in Liechtensteen un acht in Öösterriek), aver wenn een de Born-Beken Valünerbach un Stägerbach mitrekent, kummt de Waterloop von de Samina op en Längd von 21 Kilometer.
Dat Saminadaal nimmt mit siene Siedendaals üm un bi een Drüddel von dat Rebeed von Liechtensteen in, hett aver man kuum Inwahners. Na’n Alpenrhien is dat de tweetlängste Stroom in Liechtensteen.
Verloop[ännern | Bornkood ännern]
De Samina billt sik bi’n Ölersegg (Grenzpunkt twüschen Triesenberg, en Exklaav von Schaan (Brandegg) un en Exklaav von Balzers), wo Stägerbach un Valorschbach tohoopfleten doot.
De Valorschbach kummt von Oosten ut dat Rebeed von de Bargen Scheienkopf un Ochsenkopf un is bet dorhen fiev Kilometer lang. De Stägerbach kummt von Süden un billt sik in Grosssteg ut Valünerbach un Malbunerbach. De Afsnidd von Grosssteg bet Ölersegg is fiev Kilometer lang. De Valünerbach kummt ut’n Süden ut dat Rebeed von de Bargen Grauspitz un Naafkopf un is söss Kilometer lang. De Malbunerbach kummt ut’n Süüdoosten ut dat Rebeed von de Bargen Augstenberg un Ochsenkopf, flütt dör Malbun un is fiev Kilometer lang.
De Samina flütt von’n Ölersegg von Süüd na Noord dör’n Oosten von Liechtensteen un geiht op 873 m över de See över de Grenz na Öösterriek. Bi Frastanz münnt se in de Ill. Dat Water fut de Ill flütt den wieder in’n Rhien un toletzt in’e Noordsee.
Water[ännern | Bornkood ännern]
Dat Water von de Samina warrt op de een Sied intensiv bruukt, üm elektrischen Stroom to tügen, op de anner Sied aver ok as Drinkwater för de Liechtensteener Gemenen un hett de Göödklass I bet II.
In Liechtensteen liggt dat Kraftwerk Samina un in Öösterriek an’n Ünnerloop de E-Werke Frastanz mit dree Water-Kraftwarken.
Weblenken[ännern | Bornkood ännern]
Koordinaten:47° 14′ N, 9° 38′ O