Rundfunk in Uganda

Vun Wikipedia
Zur Navigation springen Zur Suche springen

Mit den Rundfunk in Uganda güng dat 1954 mit den Uganda Broadcasting Service (UBS) los. UBS schull vör allen Programm vun de BBC in Uganda sennen un schull gegen de Stimmen gegenan gahn, de sik in de Medien, also de private Press, mehr un mehr för de Unafhängigkeit utspreken deen. Dat Programm weer Engelsch un de Lüüd, de dat maakt hebbt, vör allen Briten. Afrikaners weren meist blot anstellt, dat se en lütt beten vun dat Programm ok in de inheemschen Spraken översetten schullen. Dat änner sik suutje, as 1962 Uganda unafhängig worrn weer (Alltohoop gifft dat hüüt bi 24 Spraken in’n Radio).

1993 hett de Regeren Verlööf geven för privaten Rundfunk. Bet 2006 hebbt 129 Radiosenners Lizenzen kregen, vun de 99 ok sennen doot. Feernsehsenners gifft dat bet 2006 14 un 13, de Lizenzen kregen hebbt, aver noch nich sennen doot.

Mit dat Elektroonsche-Medien-Gesett vun 2000 hett Uganda den Rundfunkraat inricht, de den Rundfunk reguleren schall.

2005 hett dat Parlament dat Uganda-Broadcasting-Corporation-Gesett verafscheedt, dat Radio Uganda un Uganda Television as Uganda Broadcasting Corporation tohoopfaten dee. Dat weer nu keen Staatssenner mehr, man en apentlichen Senner.