Rudolf Welskopf

August Rudolf Welskopf (* 26. August 1902 in Bossel; † 17. Januar 1979 in Oost-Berlin) weer en düütschen Wedderständler gegen den Natschonalsozialismus.

Welskopf is 1902 as Söhn von en Lüttpächter un Gröönhöker in Bossel (Oolland) boren un dor ok opwussen. De Familie harr nich veel in’e Melk to krömen un dorüm müss de Jung al mit teihn Johr bi Buurn in de Ümgegend as Kohhöder arbeiden. Na de Volksschool hett he en Tied as Knecht arbeidt un 1917 en Lehr as Timmermann anfungen. Na de Gesellenprüfung güng he von 1921 bet 1924 op Wannerschop un is in disse Tied ok gewerkschaftlich aktiv worrn. 1925 is he Maat von de SPD worrn un hett in Buxthu Alma Olga Bestehorn freet, mit de he twee Kinner harr. 1929 hett he en Huus för siene Familie boot. Dör de Weltweertschopskries harr he längere Tied keen Arbeid un kunn den Kredit för dat Huus nich mehr betahlen. Dat Huus is dwangsveraukschoneert worrn un de Familie harr en Tied lang keen Dack mehr över’n Kopp.

1930 is Welskopf ut de SPD rut, von wegen dat se in’n Wedderstand gegen de Nazis nich dull noog weer, un hett sik de KPD anslaten. In’n Februar 1933 is Welskopf för twee Maand in dat Gerichtsgefängnis Stood in „Schutzhaft“ kamen.

De Wedderstandsgrupp von de KPD, de Welskopf in Buxthu anföhrt harr, is uteneenslahn worrn, nadem de Gestapo en Kurier affungen harr, de denn dör Folter dor to brocht worrn is, de Naams von Welskopf un siene Genossen to verraden. Dat Berliner Kamergericht hett in’n März 1935 in Stood en Prozess gegen Welskopf un annere afhollen. Welskopf is as „Rädelsführer“ to fiev Johr Tuchthuus veroordeelt worrn. He keem in dat Tuchthuus Celle un is von dor ut en Arbeidskummando in dat Moor bi Zeven todeelt worrn. In’n August 1936 kunn he tohoop mit twee annere Fungene för korte Tied flüchten. Wegen Meuteree is Welskopf to noch teihn Maand Haft veroordeelt worrn. Na dat Enn von de formelle Hafttied is he in dat Konzentrationslager Sachsenhausen deporteert worrn. 1943 is he as Handwarker bi en Butenkummando in Berlin-Lichterfelde insett ween, dat dicht bi de Kasern von de Leibstandarte SS Adolf Hitler leeg.

An’n 27. Juli 1944 kunn he ut dit KZ-Butenlager mit Hülp von Liselotte Henrich flüchten. Ehr hett he 1946 freet, nadem he sik von siene eerste Fro hett scheden laten. Na’n Krieg weer he toeerst korte Tied Polizei-Reviervörsteher un Amtsbezirksleiter in Berlin-Charlottenburg. Later weer he in’n Bostoffhannel von de SBZ aktiv. 1950/1951 hett he för dat DDR-Ministerium för Swoorindustrie arbeidt un hett en Bargungsbedriev för Schrott un annere Weertstoffe opboot. Von 1951 bet 1962 weer he Verwaltungsbaas bi de Rieksbahn-Bo-Union.

Literatur

• Dagmar Müller-Stats: Welskopf, August Rudolf, in: Lebensläufe zwischen Elbe und Weser, Ein biographisches Lexikon, Bd. 1, hrsg. v. Brage Bei der Wieden u. Jan Lokers, Stood 2002