Rudolf Fischer (Politiker, 1940)
Rudolf Fischer (* 20. Januar 1940 in Bremen) is en düütschen Jurist un Politiker von de FDP. He weer von 1982 bet 1989 Afornten von’n neddersassischen Landdag.
Leven
[ännern | Bornkood ännern]Fischer is 1940 in Bremen boren un weer in Töst op de Volks- un Middelschool. Na de Middelschool weer he op de Ekenschool in Scheeßl un hett dor 1959 sien Abitur maakt. He hett denn Rechts- un Staatswetenschoppen an de Universitäten Marburg und München studeert. Dat eerste juristische Staatsexamen hett he 1964 an dat Oberlandsgericht Frankfort an’n Main maakt. De Referendartied hett he to’n gröttsten Deel in’n Oberlandsgerichtsbezirk Celle hatt. De twete juristische Staatsprüfung hett he 1967 vör dat Landsjustizprüfungsamt an dat Neddersassische Justizministerium in Hannover maakt. 1968 füng he as sülstännigen Avkaat in Buxthu an un is 1971 ok as Notar bestellt worrn. 1988 is Fischer as Staatssekretär in dat Neddersassische Ministerium för Bunds- un Europasaken gahn un weer dor bet 1990.
Politik
[ännern | Bornkood ännern]Fischer is 1963 Maat von de FDP worrn. He weer Vörsitter von’n FDP-Bezirksverband Elv/Werser un Viez-Landsvörsitter von de FDP Neddersassen. Fischer weer Viez-Maat von’n Verwaltungsraad bi de Stadtspoorkass Buxthu un Maat von’n Opsichtsraad in de Technologie-Zentrum Buxthu GmbH. Von 1974 bet to’n 1. März 2014 weer Fischer Raadsherr in’n Stadtraad von de Stadt Buxthu. Dor is he ok över vele Johren Vörsitter von de FDP-Frakschoon ween. Von 1976 bet 1981 weer he Afornten in’n Kreisdag von’n Landkreis Stood un eersten Viez-Landraad. Von 2006 bet 2016 weer he noch wedder Afornten in’n Kreisdag.
Fischer is in de teihnte un ölvente Wahlperiood (21. Juni 1982 bet 18. Januar 1989) över de Landslist von de FDP as Maat in’n Landdag von Neddersassen intagen. He weer von’n 22. Juni 1986 bet 18. Januar 1989 Viez-Vörsitter von de FDP-Frakschoon in’n Landdag.
Literatur
[ännern | Bornkood ännern]- Barbara Simon: Abgeordnete in Niedersachsen 1946–1994. Biographisches Handbuch. Hrsg. vom Präsidenten des Niedersächsischen Landtages. Niedersächsischer Landtag, Hannover 1996, S. 99–100
- Interview in Der Spiegel, Heft 29/1988, to siene Tätigkeit in’n Ünnersökungsutschuss von’n Landdag to dat Celler Lock (ok op spiegel.de)