Zum Inhalt springen

Royal Bunker

Vun Wikipedia

Royal Bunker is en Berliner Hip-Hop/Rap-Independent-Label. Tostann bröcht hett düt Label Marcus Staiger. He höllt dat ok tohopen.

Geschicht

[ännern | Bornkood ännern]

Mit düt Label güng dat los in en Kellerkroog mit densülbigen Naam. Dor dropen sik verscheden MCs ut Berlin 1998 dat eerste Mol to en Open Mic Session. Dat güng to, as bi dat US-amerikaansche Vörbild vun dat Freestylecafé un de Rappers konnen wiesen, wat se tostann bringt un sik ok mit anner MCs in en Battle-Rap meten. Nah een Johr möss de Kroog dichtmaken vunwegen Meedschullen vun den vörigen Besitter. De Künstlers söchen en nee Plattform, wo se jem ehr Kunst bekannt maken konnen. Dor sünd se denn bi dat Tapelabel „Mikrokosmos“ ünnerkrapen. Dat weer so üm desülbige Tiet rüm upmaakt wurrn, as dat mit de Royal Bunker Sessions losgüng. Verscheden Künstlers ut de Kuntreien dor ümto sünd rutbröcht wurrn, man 1999 löös sik dat Label up, vunwegen dat dat mank de Liddmaten, de dat upmaakt harrn, nich mehr so richtig lopen dö.

As se ut’neen gahn weern, güng dat an’n Anfang 2000 eerst mol ünner den Naam „Monopol“ fudder. Düsse Naam is denn ut Grünnen vun dat Recht aver foorts ännert wurrn in den Naam ROYAL BUNKER. Hüdigendags is dat Label en Plattform för allerhand Unnergrund MCs ut Berlin, wo se jem ehr Musik bekannt mit maken könnt.

Künstlers un wat dat to hören gifft

[ännern | Bornkood ännern]

Allerhand vun de Rappers ut Berlin, de hüdigendags jem ehr Platten allerwegens verkopen könnt, hefft an den Anfang vun jem ehr Karrier jem ehr Musik bi RB rutbröcht. Dormank sünd ünner annern Kool Savas, Prinz Pi un Die Sekte (dat sünd Sido un B-Tight). De „Sekte“ hett sik aver later böös utlaten över dat Label.

Dat Label sien Flaggschipp weer toeerst de Crew Masters of Rap (MOR). Düsse Crew hett an’n Anfang seggt, wo dat langsgüng mit den düütschen Battle-Rap. Kool Savas höör dor ok mit to. Nah en ganze Tiet, wo jedeen sien egen Saken maakt hett, keem MOR an’t Enn vun 2005 torüch mit dat Mixtape „Hiphop is still OK!“

An’n Anfang vun datsülbige Johr keem de DVD-Dokumentatschoon „Gegen die Kultur“ rut. Dor güng dat dor üm, wie dat an’n Anfang mit de Berliner Battle-Rap – Szeen in dat Royal Bunker-Café utseeg. In datsülbige Johr füng dat Label sien „Streetoffensive“ an. In en Afstand vun twee Weken schollen dor nee Alben vun de Bunker-Künstlers rutbröcht weern. Dat schollen CDs to’n lüttjen Pries weern. Dor wurr denn „Street Edition“ to seggt. Babenhen scholl dat en ganze Reeg vun Parties un Kunzerten geven. Allens tohopen scholl sik dat ansluten an de fröhe Tiet vun de Berliner Rap-Szeen. Man vun de Idee, al twee Weken en nee Album ruttobringen, is nix vun wurrn. Man de Alben „Nacht“ vun Tua un „Das Rapdeutschlandkettensägenmassaker“ vun de Grupp K.I.Z. sünd doch goot upnahmen wurrn.

Anner Künstlers, de bi Royal Bunker wat rutbröcht hefft, sünd u. a.: Rhymin Simon, Fumanschu, Justus, Jack Orsen, Fuat, Martin B., Gris, Separate, S-Rok, Big Derill Mack, Tua, Meyah Don, K.I.Z., Eko Fresh, Catee, DJ Zett (DJ Boba Fettt) un Rufmord.

[ännern | Bornkood ännern]
Vun „https://nds.wikipedia.org/w/index.php?title=Royal_Bunker&oldid=885665“