Rood Franz
De Rode Franz is ene Moorliek, de in’n November 1900 in’t Bourtanger Moor bi Meppen in’n Emsland opfunnen worrn is.
De Rode Franz weer en Mann, de in’t 3. oder 4. Johrhunnert n. Chr. leven dee. Mööglich is, dat he en Minschenopper weer, dat vun siene Mitgermanen de Slöök dörsneden kregen hett un denn naakt in’t Moor smeten worrn is. Dat nehmt de Forschers vun wegen de Laag vun de Liek an.
An’n Kopp un Liev is de Huut to’n Deel nableven, ok de Vullboort un de Kopp- un Schaamhoor. Dör dat Moorwater sünd de Hoor roodbruun, dor hett he den Naam „Rood Franz“ vun af. Welk Klöör sien Hoor vördem harr, kunnen se nich rutkriegen.
Hüüt is de Liek in’t Neddersassische Landsmuseum in Hannober to sehn.