Rhöönschaap
Dat Rhöönschaap is en Schaap wat in de Bargen vun de Rhöön tohuse is. Kennteken is de swarte Kopp, de bit achter de Ohren ohn Wull is. Dat Rhöönschaap is middelgroot, hett hoge Been un keen Höörn. Düsse Schaapraass passt wunnerbor to dat ruge Klima in de Middelgebirgen. Sien Fleesch warrt as zart, mild un krüderig ankeken.
Dat Rhöönschaap schall en vun de öllsten Huusveehrassen ween, de dat in Düütschland noch gifft. 1844 al steiht in de Akten vun dat Hoochstift Fulda to lesen:
- „Dat gewöhnliche Schaap vun den Rhöönlandbuern is en ganz normal düütsch Schaap vun en egen Aart, de ok in dat Utland unner den Naam 'Rhöönschaap' bekannt is. Dat is geel-witt mit en swarten Kopp ohn Höörn, driggt ene grove, wenig krüselige Wull, de een nich goot recken kann, hett en groot Lief, starke Knaken un wasst goot in'e Mast“.
Napoleon hett dat zarte Fleesch vun en Rhöönschaap to eten kregen, as he 1813 up'n Trüchmarsch weer un he hett sik dor achterklemmt, dat Slachttieren ut de Rhöön na Paris bröcht wurrn sünd. In Frankriek hett dat Schaap den Naam „mouton de la reine“ (De Königin ehr Schaap) kregen.
Vun dat Enne vun dat 19. Johrhunnert af an sünd dat avers gau jummers weniger Rhöönschaap wurrn. 1960 geev dat bloß noch 300 Schaap vun düsse Raass, de in dat Stammbook indragen weern. Man dorna güng dat wedder bargup mit dat Schaap.
In de lesten Johren is dat Rhöönschaap vunwegen dat Marketing vun de Region Rhöön to en vun de fründlichen Kennteken vun de Gegend wurrn. Dat gifft midderwielen mehr as 10.000 Stück.