Reagenzglas

Vun Wikipedia
Reagenzglääs mit verschedene Fletigkeiten in en Reagenzglasstänner ut Holt

En Reagenzglas (ok Eprouvette oder Provenglas) is en lang lütt Fatt ut Glas, dat an een Siet apen is. Reagenzglääs tellt to de Reedschoppen, de in Labors verwennt warrt. Se warrt dor för cheemsche Reakschonen t. B. in Ünnersöken, to’n Opbewohren vun lütte Mengden vun Fletigkeiten un vele annere Anwennen insett.

Reagenzglääs gifft dat in verscheden Grötten twüschen ruchweg 2 bit 20 cm Läng un Dörmetern twüschen 0,6 bit 3 cm. En Standardgrött, de in cheemsche Labors bruukt warrt, is 16 cm lang un 16 mm in’n Dörmeter. Man kann de Glääs ok tomaken. Dorto warrt Kunststofffolie bruukt, Verslusskappen ut Aluminium, Kork- oder Kunststoffstoppens (in de Ümgangsspraak warrt dorto meist Stöpsel seggt). In’n Hannel gifft dat ok Reagenzglääs, de na Norm slepen sünd, un mit Sliepstoppen ut Glas oder Kunststoff tomaakt warrn. Op eenige sünd ok en Volumenskala in Milliliters opdruckt. Glääs, de in en Flamm (t. B. an’n Bunsenbrenner) hitt maakt warrn schüllt, hebbt tomeist en dünne Wand. Dat schall Bröök dör thermische Spannungen hinnern.

De Pries för en eenfack Reagenzglas in Standardgrött (16 cm) liggt bi ruchweg 10 Cent oder mehr, afhangig vun’t Material un Utföhren. To’n Bispeel köst en Reagenzglas ut Bruunglas mit Normsleep un Oliv (as Oliv oder Ansatz warrt en Glasrohr nöömt, dat na de Siet afsteiht un an dat man en Slauch ansluten kann) twüschen 3 un wiet mehr as 10 Euro.

Butendem gifft dat Reagenzglääs ok in ünnerscheedliche Formen. So künnt se en runnen, konischen oder evenen Bodden hebben un en Bördel- oder en gradueerten Rand hebben. Afstellt warrt Reagenzglääs faken in egene Reagenzglasstänners.

Weblenken[ännern | Bornkood ännern]

Reagenzglas. Mehr Biller, Videos oder Audiodateien to’t Thema gifft dat bi Wikimedia Commons.