Radjahgoos

Vun Wikipedia
Zur Navigation springen Zur Suche springen
Radjahgoos; Mollukkenaante
Radjahgoos
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Halfgöse (Tadorninae)
Tribus: Echte Halfgöse (Tadornini)
Geslecht: Buntgöse (Tadorna)
Oort: Radjahgoos
Wetenschoplich Naam
Tadorna radjah
Lesson, 1828

De Radjahgoos oder ok Molukkenaante (Tadorna radjah) is en Vagel, de to de Halfgöse rekent warrt. Mank de Halfgöse tellt se to de Echten Halfgöse, un dor denn to de Buntgöse.

Kennteken[ännern | Bornkood ännern]

De Radjahgoos warrt bit hen to 52 cm lang. Ganner un Goos verscheelt sik na dat Utsehn nich. Kopp, Hals, Bost un Buuk sünd to'n groten Deel witt. As de europääsche Bargaante hett se en kastanjenbrunet Band over de Bost, man smaller un dunkerer. De Ruggen un de Flunken sünd dunkerbruun.

Wo se vörkamen un wo se leven deit[ännern | Bornkood ännern]

De Radjahgoos kummt vör in de nöördlichen Deele vun West-Australien, in dat Nöördliche Territorium (Natschonalpark Kakadu) un in Queensland, dorto in Nee-Guinea, sunnerlich an de Süüdküst vun Papua-Neeguinea, man ok in West-Papua un up de Eilannen Japen, Goodenough, Fergusson, Aruh-Eilannen un up de Molukken.

Dor leevt se sunnerlich in flack Solt-, Brack- un Söötwater, also in den Tiedenstroom, Münnen vun de Ströme, in Lagunen un Bröke langs de Küst. Düsse Halfgöse leevt alleen oder as Paare. In de dröge Tied kaamt se in gröttere Gruppen tohopen in Soltwaterlagunen.

Düsse Aart hett twee Unneraarden:

  • Tadorna radjah radjah: Vun de Molukken bit hen na Nee-Guinea.
  • Tadorna radjah rufitergum: In dat nöördliche un ööstliche Australien.

Wie se sik vermehren deit[ännern | Bornkood ännern]

In de Brödeltied warrt dat Nest in en hollen Boom, nich wiet af vun't Water, boot. Nestmaterial warrt meist gor nich bruukt, man bloß en poor Dunen. De Goos leggt 6 bit 12 Eier, de Ganner brott nich mit. Dat duert um un bi 30 Dage, denn kruupt de Lüttjen ut. Radjahgöse freet allerhand lüttje Deerter, as Weekdeerter. Bloß en ringen Deel vun ehr Freten sünd Planten.

Schuul[ännern | Bornkood ännern]

De Rajahgöse leevt in en groot Rebeet, vundeswegen besteiht keen grote Gefohr, dat de Aart utstarven deit. Wie veel vun düsse Halfgöse dat gifft, is nich bekannt, man de Tahl löppt achterut. Man dat Tempo vun den Achtrutgang liggt unner 30 % in tein Johre (minner, as 3,5 % in't Johr). Vundeswegen steiht de Vagel up de Rode List vun den IUCN unner „gor keen Sorgen“. In Australien sünd Jagd un Stören vun düssen Vagel dör dat Gesett verbaden.

Literatur[ännern | Bornkood ännern]

  • Beehler, B.M., T.K. Pratt & D.A.Zimmerman}} 1986. Birds of New Guinea. Princeton University Press. ISBN 0-691-02394-8.
  • Pizzey, G & R. Doyle}}, 1980. A field guide to the birds of Australia. Collins, Sydney.

Weblenken[ännern | Bornkood ännern]

Commons-logo.svg Radjahgoos. Mehr Biller, Videos oder Audiodateien to’t Thema gifft dat bi Wikimedia Commons.