Priapismus
As Duerverstieven oder Priapismus (latiniseerte Form vun’t greeksche πριαπισμός priapismós „Erekschoon“) warrt en duersome Erekschoon vun’n Pint betekent, de wehdeit, länger as twee Stünnen anduert un to en erektile Dysfunkschoon föhren kann, wenn se nich behannelt warrt. Üm duersomen Schaden to hinnern is dorüm en mööglichst gaue Therapie nödig. Bi de Fronslüüd is de Klitorismus vergliekbor, wobi hier aver ok de eenfacke Hypertrophie vun de Klitoris so heet.
De Naam is vun den greekschen Gott Priapos afleidt, de in de Mythologie de Söhn is vun Aphrodite un Dionysos un as Fruchtborkeitsgott bildlich mit en övergroten, stieven Pint dorstellt warrt.
Bi’n Priapismus sünd beide Pintswellkörpers stief, man de Ekel un dat corpus spongiosum blievt lasch. Disse Form vun Erekschoon deit weh un is nich mit en Lustgeföhl verbunnen. Warrt de Priapismus nich behannelt, höört de Erekschoon eerst na twee bit dree Weken wedder spontan op. Tomeist sünd de Swellkörpers vun’n Pint denn aver fibrös ümwannelt, so dat dat Erekschoonsvermögen vun’t Pint tonichten maakt is.
Formen
[ännern | Bornkood ännern]De Medizin ünnerscheedt twee formen vun’n Priapismus:
- Low-Flow-Tyyp
- Disse Typp is för ruchweg 90 % vun all Priapismus-Fäll verantwoortlich. Dorbi föhrt dat minnerte Aflopen vun’t venöse Blood ut de Swellkörpers (lat.: corpora cavernosa) vun’n Pint to de verlängerten Erekschoon.
- High-Flow-Tyyp
- Bi disse Form is vör allen en anstegen Toloop vun artierell Blood verantwoortlich.
De Low-Flow-Tyyp is dorbi düütlich gefährlicher as de High-Flow-Tyyp, vunwegen dorbi dat gladde Muskelgeweev mit to wenig Suerstoff versorgt warrt. Wenn disse Ünnerversorgen to lang anduert, föhrt dat to’n duersomen hypoxischen Schaden an’t Muskelgeweev.[1]
Oorsaken
[ännern | Bornkood ännern]Bi mehr als de Hälft vun de Fäll kann de Oorsaak vun’n Priapismus nich faststellt warrn. Man snackt denn vun en idiopaathschen oder primären Priapismus. An de Universität vun Texas hebbt Forscher 2008 dör Tofall rutfunnen, dat bi genetisch verännerte Müüs en duersome Erekschoon beobacht warrn künn. De Müüs fehl en Enzym] to’n Afbo vun Adenosin, so dat antonehmen is, dat dat fehlen Enzym den Priapismus utlöst.
Möögliche Oorsaken vun de sekundären Form sünd:
- Bloodkrankheiten as lymphaatsche Leukämie, Sichzellenanämie, Plasmozytom, Thalassämie un Polyzythämie, paroxysmal nokturne Hämoglobinurie
- Psychopharmaka un annere Heelmiddels vör allen bi’n Överdoseeren, sünners aver ok Heelmiddels, de to’n Behanneln vun de erektilen Dysfunkschoon dör Injekschoon in den Swellkörper anwennt warrt
- Alkohol- un Drogenmissbruuk
- Stollstören, to’n Bispeel as Kumplikatschoon bi de Gaav vun Heparin vör allen bi en Dialyys
- böösordige Tumoren
- Thrombosen
- Schaden vun’t NervensysteemNervensystem bi Sehren (ok vun’t Rüchmark), Multiple Skleroos un Diabetes mellitus as ok bi Tabes dorsalis
- Stoffwesselkranheiten as Diabetes mellitus, Amyloidoos, Gicht, Nephrootsch Syndrom
- en korttietig Priapismus (2–24 Stünnen) kann ok dör PDE-5-Törners utlöst warrn as Sildenafil, Tadalafil oder Vardenafil, de den Afbo vun Guanosinmonophosphat (GMP) hinnert, dat sülvst wedder för’t Entspannen vun de Fattmuskulatur sorgt.
- Beet vun de Wannerspinn
Therapie
[ännern | Bornkood ännern]Bi en Priapismus hannelt sik dat üm en Nootfall, de gau na en Plaan behannelt warrn mutt. Toeerst mutt versöcht warrn, mööglichst veel Blood ut de Swellkörpers aftotehn. De konservative Therapie stellt to’n Bispeel Bewegung oder Muskelarbeit dor. Wenn dat keen Spood hett, warrt alpha-adrenerge Stoffen as to’n Bispeel Etilefrin sprütt, wobi jümmerto de Blooddruck in de Swellkörpers kontrolleert warrt. En wietere Mööglichkeit is, dat Corpus cavernosum mit en stark verdünnte Adrenalinlösen to spölen.[1] Opletzt kamt ok en Operatschoon in Fraag. Op jeden Fall mutt blangeto ok en Pientherapie dörföhrt warrn.
An’n Besten is dat, den Priapismus in en uroloogsche Nootfallambulanz behanneln to laten.[1] Wenn en fachlich richtige Behanneln na höchstens twölf Stünnen insett kann in 90 % vun de Fäll en duersome Erekschoonsstören hinnert warrn. Man beter is dat, wenn de Therapie al na veer bit söss Stünnen anfangt.[1]
Naklapp
[ännern | Bornkood ännern]As Naklapp – sünners wenn de Therapie to laat anfungen worrn is – kann dat to en Pintdeviatschoon, Erekschoonsunvermögen un mitünner sogor to en Gangrän kamen.[2]